Fınlıandııa elde turaqtaýǵa ruqsat alý erejelerin qatańdatpaq

ASTANA. KAZINFORM — 2026 jylǵy 8 qańtardan bastap Fınlıandııada turaqty turýǵa ruqsat alý úshin talaptar kúsheıtiledi, dep habarlaıdy DW agenttigi Yle-ge silteme jasap.

Agenttik taratqan aqparatqa sáıkes, endi ótinish berýshilerge elde tórt jyl ornyna alty jyl turý, fın nemese shved tilin qanaǵattanarlyq deńgeıde meńgerý, sondaı-aq eki jyl eńbek ótili qajet bolady.

Tórt jyl boıy elde turǵan negizde turaqtaýǵa ruqsat alý áli de múmkin, biraq tek úsh sharttyń bireýin oryndaǵan jaǵdaıda ǵana:

• jyldyq tabys eń keminde 40 000 eýro bolýy,

• Fınlıandııada moıyndalǵan magıstr dárejesi nemese joǵary bilim, eki jyl eńbek ótilimen birge,

• fın nemese shved tilin joǵary deńgeıde meńgerý jáne úsh jyl jumys tájirıbesiniń bolýy.

Úkimet sonymen qatar azamattyq týraly zańǵa ózgerister engizýdi daıyndap jatyr. Onda azamattyqqa ótetin mindetti test engiziledi. Bul emtıhan Fınlıandııa qoǵamynyń qurylymy, onyń qundylyqtary, zańdary, adamnyń quqyqtary men mindetteri, sondaı-aq eldiń tarıhy men mádenıeti týraly bilimdi tekserýge arnalǵan. Test fın nemese shved tilderinde ótedi. Balamasy retinde fın mektebiniń bitirý emtıhanyn tapsyrýǵa bolady, al memlekettik tilderde joǵary bilimi bar adamdar test tapsyrýdan bosatylady.

Azamattyq týraly zań jobasy 2026 jyldyń aqpanyna deıin talqylanady, al ózgeristerdiń kúshine enýi 2027 jyldyń basynda kútilýde.

Budan buryn Fınlıandııada zańsyz jeke mektepter sany artyp kele jatqanyn jazǵanbyz.

Sonymen qatar eldiń Qorǵanys mınıstrligi aldaǵy bes jyl ishinde áskerı rezervtiń sany bir mıllıon adamnan asady dep josparlap otyrǵany habarlandy.