Fındik boksshy Sháripovamen aıqasy jaıly: Kimniń murny buzylaryn kóremiz

ALMATY. QazAqparat - WBC nusqasy boıynsha álem chempıony fınlıandııalyq Eva Valstrem qazaqstandyq kásibı boksshy Fırýza Sháripovamen aldaǵy jekpe-jegi týraly málim etti, dep habarlaıdy QazAqparat tilshisi.

Valstrem Instagram-da óziniń jáne Sháripovanyń fotosýretin ornalastyrdy. Onda chempıon qyzdardyń betterinde kógergen isikter baıqalady.

«22 jeltoqsan kúni Sankt-Peterbýrgta chempıondyq eki beldik úshin rıngte kezdeskende kimniń murny shydas beredi, al kimdiki buzylady?», - dep jazdy fındik boksshy.

Aıta keteıik, Fırýza Sháripova WIBA, WBC Silver, IBO Championship tujyrymdary boıynsha eki salmaq sanatynda birqatar chempıondyq beldiktiń ıegeri. 

Sháripova-Valstrem jekpe-jegi 22 jeltoqsan kúni Sankt-Peterbýrgtaǵy «Sıbýr Arena» kontserttik-sport kesheninde ótedi. Báske fındik boksshy ıe WBC nusqasy boıynsha ekinshi jartylaı jeńil salmaqtaǵy álem chempıony beldigi, sondaı-aq qazaqstandyq qyzǵa tıesili IBO Championship tıtýly qoıylǵan. Kezdesý jeńimpazy atalmysh salmaqta álemdegi eń úzdik sanalatyn bolady.

Eske salaıyq, bıylǵy 8 qyrkúıekte Sankt-Peterbýrg qalasyndaǵy A2 arenasynda Sháripova reseılik ıÝlııa Kýtsenkony jeńip, óziniń ataqtarynyń birin qorǵap qaldy. Keıin, qazaqstandyq sportshynyń murny synǵany belgili boldy. Boks keshine óziniń jubaıymen jáne komandasymen birge Valstrem de kelip, bolashaq qarsylasynyń aıqasyn tamashalaǵan bolatyn. Aıqastan keıin ol rıngke kóterilip, Sháripovamen kózqarastar dýelin ótkizdi.

Al Valstrem 6 sáýir kúni Helsınkıde AQSh boksshysy Melıssa Sent-Vılızge qarsy aıqasta óz tıtýlyn qorǵaǵan edi.