Fınderdiń jartysyna jýyǵy zeınetke erte shyqqysy keledi

ASTANA. KAZINFORM — OP qarjy toby júrgizgen saýalnamaǵa sáıkes, fınderdiń 48 paıyzy resmı túrde zeınet jasyna jetpeı zeınetke shyǵýdy qalaıdy, dep jazady AZERTADJ.

Agenttik habarlaǵandaı, negizgi sebep — jumystan bosap, basqa isterge ýaqyt arnaýdy qalaý.

Erte zeınetke shyǵýǵa degen umtylys ásirese 35–49 jas aralyǵyndaǵy adamdar arasynda kúshtirek baıqalady — olardyń jartysynan astamy resmı zeınet jasyna deıin kútkisi kelmeıdi. Muny jastar da armandaıtyn kórinedi: 26–34 jastaǵy ár besinshi adam 50 jasqa deıin zeınetke shyǵýdy qalaıtynyn aıtqan. Bul Fınlıandııanyń Zeınetaqy ortalyǵy belgilegen zeınet jasy kórsetkishterinen aıtarlyqtaı erekshelenedi. Mysaly, 1995 jyly týǵandar úshin eń tómengi zeınet jasy — 68 jas.

OP Life Assurance kompanııasynyń dırektory Krıstıına Mıhelsson saýalnama nátıjelerin alańdatarlyq dep baǵalap, bul qoǵam múddesi men jeke adamnyń qalaýy arasyndaǵy qaıshylyqty kórsetetinin aıtty. Ol zeınetaqy júıesiniń turaqty jumys isteýi úshin eńbek etetin kezeńdi uzartý mańyzdy ekenin basa aıtty.

Respondentterdiń jartysyna jýyǵy úshin eń qolaıly zeınet jasy — 60–69 jas aralyǵy, al úshten biri tipti 60-qa jetpeı zeınetke shyqqysy keledi. Fınlıandııa Zeınetaqy ortalyǵynyń derekterine sáıkes, ótken jyly eldegi kútiletin ortasha zeınetke shyǵý jasy 63,1-di quraǵan.

Zeınetke erte shyǵýdy qalaýdyń sebepteri mynalar: jumystan tys ýaqytty tıimdi ótkizý (49%), jumys ornyndaǵy qysym (16%) jáne densaýlyq máseleleri (12%).

K. Mıhelssonnyń pikirinshe, erte zeınetke shyǵý shyndyqqa aınalýy úshin uzaqmerzimdi jınaq pen ınvestıtsııa qajet, sondaı-aq ómirdiń barlyq kezeńinde qyzmetkerlerge kóbirek qoldaý kórsetilýi tıis.

Osyǵan deıin Estonııa men Fınlıandııada 70 jastan asqan turǵyndar úlesi eki ese artqanyn jazǵanbyz.