Fınder Aqmola oblysynda ınnovatsııalyq jobalardy júzege asyrýǵa yntaly
KÓKShETAÝ. QazAqparat - Fınder Aqmola oblysynda ınnovatsııalyq jobalardy júzege asyrýǵa yntaly. Bul týraly aımaq basshysy Málik Myrzalınniń fınlıandııalyq «UROS» kompanııasynyń negizin qalaýshy ıÝrkı Hallıkaınen bastaǵan isker top ókilderimen kezdesýinde aıtyldy, dep habarlaıdy QazAqparat tilshisi ákimdiktiń baspasóz qyzmetine silteme jasap.
ıÝrkı Hallıkaınennen bólek, delegatsııa quramynda «UROS» kompanııasynyń atqarýshy dırektory Djerrı Raatıkaınen, PISARA kompanııasynyń atqarýshy dırektory Sakarı Laıtınen jáne «Kaukointernational Central Asia» jaýapkershiligi shekteýli seriktestiginiń bas atqarýshy dırektory Vladımır Oleşenko bar.
Kezdesýde taraptar óńirde jasyl jáne IT-tehnologııa salasynda birlesken jobalardy júzege asyrý múmkindikterin qarastyrdy.
ıÝrkı Hallıkaınenniń aıtýyna qaraǵanda, 2011 jyly negizi qalanǵan «UROS» kompanııasy mobıldi bızneste symsyz tehnologııany paıdalanýmen tanymal. Germanııa, Qytaı, AQSh, Shveıtsarııa sııaqty álemniń kóptegen elderinde fılıaldary jumys isteıdi. Kompanııa mobıldi bıznes qana emes, sonymen qatar tabıǵı resýrstardy tıimdi qoldaný, energııa únemdeıtin tehnologııalar, qorshaǵan ortaǵa keltiriletin zııan mólsherin barynsha azaıtý, qatty turmystyq qaldyqtardy óńdeý, sý, energııa júıesin tsıfrlandyrý jáne qazirgi zamańǵy tehnologııa boıynsha turǵyn úı salýdy da júzege asyrady.
«Bizdiń korporatsııanyń quramynda turmystyq qaldyqtardy óńdeý, balamaly energııa óndirý jáne energııa únemdeýmen aınalysatyn Fınlıandııanyń ınnovatsııalyq-tehnologııalyq kompanııalary bar. Bizge sizdermen Fınlıandııanyń tájirıbesimen bólisý mańyzdy. Óıtkeni, Fınlıandııa ekologııalyq tıimdiliktiń halyqaralyq ındeksi boıynsha dúnıejúzindegi «jasyl el» sanalady. Biz turmystyq qaldyqtardy qaıta óńdeý, orman jáne sý tazalaý nysandary, bıogaz stansasynyń qurylysy, sý sektorlaryn tsıfrlandyrý jáne ındýstrıaldy jáne týrızm salasynda ınvestıtsııa tartý boıynsha birlese jumys isteýge qyzyǵýshylyq tanytyp otyrmyz», dedi Vladımır Oleşenko.
Óz kezeginde aımaq basshysy sheteldikterdiń usynysyna qyzyǵýshylyq tanytyp, birlese jumys isteýge daıyn ekenin jetkizdi. Ásirese, aımaq basshysy Fınlıandııanyń turǵyn úı kommýnaldyq salasyn tsıfrlandyrý boıynsha mol tájirıbesin eskere kele, óńirde «Aqmola Smart» jobasynyn iske qosylǵanyn atap ótti.
«Biz jan-jaqty áriptestik ornatýǵa daıynbyz. Ásirese, bizge óńirde qysqy týrızmdi damytýda Fınlıandııanyń tájirıbesi qyzyqtyrady», - oblys ákimi.
