Financial Times: Qazaqstan ınvestorlarǵa memlekettik kompanııalardaǵy úlesti usynady
ASTANA. QazAqparat - Búgin Qazaqstan Úkimeti memlekettik aktıvterdi jekeshelendirýdiń aýqymdy úderisin ázirleýde. Bul rette Úkimet qazaqstandyq jáne sheteldik ınvestorlarǵa iri kompanııalardaǵy úlesti usynýǵa daıyn, dep jazady Financial Times.
Financial Times aqparaty boıynsha jekeshelendirýge 60 iri obekt ázirlenýde. «QazMunaıGaz» munaı kompanııasy, «Qazaqtelekom» iri telekommýnıkatsııalyq kompanııa, «Qazaqstan Temir joly» temirjol kompanııasy, «QazAtomÓndiris», ýran óndirisi kompanııasy jáne «Samuryq-Energo» kompanııalara bar. Jekeshelendirýdiń naqty málimetteri áli jarııalanbaǵan.
«Samuryq-Qazyna» memlekettik holdınginiń Basqarma Tóraǵasy Ómirzaq Shókeevke silteme jasaǵan Financial Times, ınvestorlarǵa negizinen memlekettik kompanııalardyń 25 paıyzdan kem bolmaıtyn mólsherdegi úlesi usynylatynyn atap ótedi, sonyń ishinde olardyń aktsııalary Qazaqstannyń, London men Gonkongtegi qor bırjalaryna ornalastyrý jolymen júzege asatyn bolady.
Sonymen birge, Astana halyqaralyq qarjy ortalyǵy bolýǵa da ázirlenýde, onyń Dýbaı qarjy ortalyǵy úlgisinde qurylatyny josparlanýda. Ortalyqtyń alańynda memelkettik kompanııalar aktsııalaryn ornalastyrý da júzege asatyn bolady. 2012 jyly Qazaqstanda Halyqtyq ІRO baǵdarlamasy júzege asqan bolatyn. Onyń aıasynda qarjy naryǵyna «QazTransOıl» munaı tasymaldaý kompanııasy men «KEGOC» elektr energetıkalyq kompanııasy shyǵarylǵan.
«Qazaqstan Temir joly» vıtse prezıdenti Maqsat Qabashev jolaýshylar tasymaly sektoryn damytý úshin kompanııa halyqaralyq seriktes izdep jatqanyn málimdegen bolatyn. Onyń aıtýynsha, Eýropa men Qytaı arasyndaǵy baılanysty jańǵyrta alatyn Qazaqstannyń geografııalyq ornalasý yńǵaılylyǵy da yqtımal ınvestorlar úshin tartymdy bolmaq. Financial Times budan bólek, Ómirzaq Shókeevtiń «Samuryq-Qazyna» Qorynyń ınvestıtsııalyq strategııasy ózgeretini jáne Qordyń óziniń baqylaıtyn ekonomıka sektoryna jeke ınvestorlarmen áriptestik boıynsha salymdar jasaý múmkindigi týraly málimdemesin de keltiredi. Máselen, aǵymdaǵy aıdyń basynda «Samuryq-Qazyna» memlekettik holdıngi brıtandyq tarappen munaıgaz, taý-ken óndirisi, energetıka salasynda ekijaqty qujattarǵa qol qoıylǵanyn málimdegen. Ondaǵy kelisimderdi júzege asyrý áleýeti 3 mlrd AQSh dollaryna baǵalanady. Bul qujattar el Prezıdenti Nursultan Nazarbaevtyń Ulybrıtanııaǵa sapary barysynda qol qoıylǵan.
Kelisimsharttar boıynsha Independent Power Corporation brıtandyq operatorynyń Qazaqstanda tórt gaztrýbına stantsııalarynyń qurylysyn salý, brıtandyq United Green kompanııasymen birlesip 105 mln AQSh dollaryn quraıtyn kún elektr stantsııalarynyń qurylysyn júzege asyrý, brıtanııalyq kompanııalardyń qatysýymen volfram óndirý boıynsha birlesken kásiporyn qurý jáne basqa da jobalardy qarjylandyrý qarastyrylyp otyr.
