Fınaldyq jekpe-jek qıynyraq boldy – álem chempıony Aslanbek Shymbergenov

ASTANA. QazAqparat – Ózbekstanda ótken bokstan álem chempıonatynyń jeńimpazdary men júldegerlerin qarsy alý saltanatynda qurama kapıtany Aslanbek Shymbergenov jarys jolynan shyǵyp qalǵan Sáken Bıbosynovtyń jekpe-jegine qatysty pikir bildirdi, dep habarlaıdy QazAqparat tilshisi.

«Jarys óte joǵary deńgeıde ótti. Bar kúshimizdi salyp, birinshi oryn aldyq. Qazaq eli qýandy dep oılaımyn, ózim de qatty qýanyp turmyn. Bul álem chempıonaty qatysýshylar sany eń kóp tirkelgen saıys bolyp sanalady. Ár kezdesýdiń ózindik qıynshylyǵy bar. Men úshin fınaldyq jekpe-jek qıynyraq boldy», - dedi álem chempıony Aslanbek Shymbergenov.

Ol sonymen qatar kóp talqylaýǵa túsken Sáken Bıbosynovtyń jekpe-jegine qatysty pikir bildirdi.

«Jalpy saıys ádil ótti. Degenmen Sáken Bıbosynovtyń jekpe-jeginiń qorytyndysy kúmándi dep aıtýǵa bolady. Meniń kózqarasym boıynsha Sáken utyp turǵan sııaqty. Al tóreshiler basqa sheshim shyǵardy. Biz tóreshilerge qarsy shyǵa almaımyz», - dep pikir qosty boksshy BAQ ókilderiniń saýalyna jaýap bere otyryp.

Eske salaıyq, Sáken Bıbosynov atalǵan chempıonattaǵy alǵashqy kezdesýinde tóreshiler sheshimimen jeńilip qalǵan edi.

Keıin Qazaqstan boks federatsııasy Sáken Bıbosynov jekpe-jegine qatysty Halyqaralyq boks federatsııasynyń basshylyǵyna shaǵym joldady.

Qosa ketsek búgin jeńimpazdardyń alǵashqy legi elge oraldy. Chempıondardyń ekinshi toby – Sanjar Táshkenbaı men Nurbek Oralbaı Astana ýaqytymen saǵat 16:00-de elordaǵa qonady.

Aıta keteıik, Qazaqstan quramasy Ózbekstanda ótken álem chempıonatyn 4 altyn, 1 kúmis medalmen aıaqtady. Sportshylardy Memleket basshysy Qasym-Jomart Toqaev quttyqtady.