Fınalda Qazaqstan quramasyna laıyqty qarsylas bola almadyq – Shıgekı Hıtosato
HARBIN. KAZINFORM – Hokkeıden Japonııa erler quramasynyń shabýylshysy Shıgekı Hıtosato Kazinform tilshisine eksklıýzıvti suhbat berip, qysqy Azıadanyń fınalynda Qazaqstan quramasymen bolǵan oıyn týraly aıtty.
Ol bul kezdesýde qarsylas komandaǵa laıyqty qarsylyq kórsete almaǵanyna ókinishin bildirdi.
– Tartysqa toly oıyn bolady dep topshylaǵanmyn. Degenmen olaı bolmaı shyqty. Kezdesý Qazaqstannyń aıqyn basymdylyǵymen ótti. Qarsylastarymyz bizge esh múmkindik bermedi. Fınalda Qazaqstan quramasyna laıyqty qarsylas bola almadyq. Alaıda, qaıta oınaý múmkindigi bolsa, budan jaqsy oınaýǵa tyrysar edik, - dedi Hıtosato.
Hıtosato Qazaqstan qysqy Azııa oıyndaryna myqty qurammen kelgenin atap ótti.
– Qazaqstan – myqty komanda. Olar qysqy Azıadaǵa úzdik oıynshylarymen keldi. Arasynda Qurlyqtyq hokkeı lıgasynda (QHL) oınaıtyn birneshe sportshysy bar, - dedi japonııalyq hokkeıshi.
Shıgekı Hıtosato sóz arasynda qysqy Azııa oıyndarynyń ashylý saltanatyna qatysa almaǵanyn, jabylý saltanatynda tóbe kórsetýdi josparlap otyrǵanyn tilge tıek etti.
Buǵan deıin habarlaǵanymyzdaı, Qazaqstan ereler quramasy qysqy Azııa oıyndarynda toptyq kezeńdi qosa alǵanda barlyq qarysylasyn jeńip, chempıon boldy.
Sondaı-aq jartylaı fınalda Qazaqstannan jeńilgen hokkeıden Qytaı erler quramasynyń kapıtany Chjan Tszıatsı Kazinofrm tilshisine bergen suhbatynda qazaqstandyqtardan kóp nárse úırengenin aıtqan bolatyn.