Fın mamany «Saryarqa» HK-niń bas jattyqtyrýshysy boldy

ASTANA. QazAqparat - 58 jastaǵy fın mamany Karı Heıkkılıa qaraǵandylyq «Saryarqa» hokkeı klýbynyń bas jattyqtyrýshysy qyzmetine taǵaıyndaldy. Eki jaq bir maýsymǵa kelisimshart ornatty, dep habarlaıdy oblystyq ákimdiktiń baspasóz qyzmeti.

Karı Heıkkılıa 1960 jyly 10 qańtarda Kangasala qalasynda (Fınlıandııa) dúnıege kelgen.

Oıynshy (qorǵaýshy) retinde 1978-shi jyldan 1994-shi jylǵa deıingi ýaqyt aralyǵynda kelesi klýbtarda óner kórsetken: «Kalgarı Renglers», «Vıktorııa Kýgars» (Kanada, WHL), «Ilves» (Tampere, Fınlıandııa), «Lýleo», «Vıta Hıasten» (Shvetsııa), «Fassa» (Italııa).

Fınlıandııa chempıonatynyń eki dúrkin qola júldegeri, onda 277 oıynǵa qatysqan. Óz eliniń quramasy úshin Heıkkılıa segiz oıyn ótkizgen.

Onyń jattyqtyrýshy retindegi eńbek joly 1994 jyly «Sýndsval» shved klýbynda bastalǵan. Bapker, sonymen qatar, shvedtik «Býdenmen», fındik HPK, «Vassa sportpen» jáne «Kerpet» klýbtarymen jumys istegen. 2004-shi jyly Heıkkılıa Reseı chempıonatyndaǵy alǵashqy fın jattyqtyrýshysy atanǵan. Maman ıaroslavtik «Lokomotıvti» 2004-2005, 2007-2010 jyldarǵy maýsymda, magnıtogorlyq «Metallýrgti» (2010-2011), mınskilik «Dınamony» (2012), nıjnekamskilik «Neftehımıkti» (2013-2014), rıgalyq «Dınamony» (2015-2016), fındik «Lýkkony» (2016-2017) jattyqtyrǵan. 2017-2018 jyldary «Ilves» fın klýbynda sport menedjeri qyzmetin atqarǵan.

Sonymen qatar ol 2012 jyly ótken álem chempıonatynda Belarýs Respýblıkasynyń ulttyq quramasymen jumys istegen.