Fın kompanııalary úshin Qazaqstannyń týrızm salasy da tartymdy
«Týrızmdi damytýǵa basa mán berilýde. Týrıstik salany damytý tujyrymdamasy júzege asyrylyp jatyr. Biz saladaǵy ekijaqty yntymaqtastyqtyń keleshegi zor baǵyty retinde ańshylyq pen balyq aýlaý, mádenı, bilim berý jáne medıtsınalyq týrızmdi damytýdy kóremiz», - dedi Nursultan Nazarbaev.
Osy rette Memleket basshysy Qazaqstannyń tabıǵı basymdyǵy men týrızm salasyndaǵy fın kompanııalarynyń mol tájirıbesi eki elge de ózara tıimdilik ákeletindigin basa aıtty.
«Bıznesmender bıznesti damytyp, ózara tıimdi seriktestikti nyǵaıtý úshin qolda bar múmkinshilikterdi paıdalanýy qajet», - dep atap ótti Qazaqstan Prezıdenti.
Esterińizge sala ketsek, búgin Qazaqstan Prezıdenti Nursultan Nazarbaev resmı saparmen Fınlıandııaǵa keldi.
Sapar aıasynda Elbasy fın bıznes kapıtandarymen kezdesti.
Kezdesý barysynda Memleket basshysy Fınlıandııadan Qazaqstan arqyly Qytaıǵa jańa temir jol baǵdary ashylatyndyǵyn aıtty jáne fın kompanııalaryn elimizdiń agroónerkásiptik keshendegi jobalardy júzege asyrýǵa shaqyrdy.
Al erteń Nursultan Nazarbaevtyń Fınlıandııa Respýblıkasynyń Prezıdenti Saýlı Nıınıstemen shaǵyn jáne keńeıtilgen quramdaǵy kezdesýi josparlanyp otyr.