Fılosofııa doktorlarynyń (PhD) dıssertatsııasy ashyq túrde qorǵalmaq
ALMATY. Mamyrdyń 11-i. QazAqparat /Ádilet Musahaev/ - Erteń Ál-Farabı atyndaǵy Qazaq ulttyq ýnıversıtetiniń 2010 jylǵy PhD doktorlarynyń túlekteri «fılosofııa doktory» akademııalyq dárejesi boıynsha dıssertatsııany ashyq túrde qorǵaıtyn bolady,
dep habarlaıdy QazAqparat QazUÝ-diń baspasóz qyzmetine silteme jasap.
Atalmysh ýnıversıtettiń PhD doktorlarynyń dıssertatsııalyq eńbekteri QR Bilim jáne ǵylym mınıstrliginiń talaptaryna saı qorǵalmaq. Óıtkeni, olar ǵylymı jumystaryn Memlekettik attestatsııalyq komıssııanyń aldynda qorǵaıtyn bolady. QR Bilim jáne ǵylym mınıstrliginiń taǵaıyndaýymen komıssııa quramynda 12 ǵylym doktory men komıssııa tóraǵalary bar. Sondaı-aq qorǵaýǵa ǴZI jáne zertteý ortalyqtarynyń dırektorlary, mádenı ortalyqtardyń ókilderi, iri kompanııalar men kásiporyndardyń basshylary shaqyrylǵan.
Eńbekterdi qorǵaýda qoıylatyn basty talap ǵylymı jumystar sheteldik ǵylymı basylymda jarııalanýy tıis. Sonymen qatar fılosof doktorlaryna qoıylǵan halyqaralyq standarttarǵa jaýap beretindigininen maǵlumat beretin sheteldik ǵylymı jetekshiniń pikiri bolý kerek.
Ál-Farabı atyndaǵy QazUÝ-de PhD doktorlaryn daıyndaý 2005 jyldan bastaý alady. Otandyq fılosof doktorlaryn daıyndaýda memlekettiń tanymal ǵalymdary, ǵylym doktorlary, Eýropa, Soltústik Amerıka, Japonııa jáne TMD elderiniń ǵylymı ortalyqtary men oqý ordalarynyń ǵylymı jetekshileri birlesip eńbek etken. Sondaı-aq doktoranttar otandyq jáne sheteldik ǵylymı jetekshileriniń qoldaýymen dúnıe júziniń bedeldi oqý ordalarynda synaq merzimin ótkizýge múmkindikteri bar.
