Fılosof J.Ábdildınniń 80 jyldyǵyna arnalǵan halyqaralyq konferentsııa bastaldy
ASTANA. 14 aqpan. QazAqparat - 16 aqpan kúni ǵalym, fılosofııa ǵylymdarynyń doktory, professor, QR UǴA akademıgi, QR Memlekettik syılyǵynyń laýreaty Jabaıhan Múbárakuly Ábdildın 80 jasqa tolady. Osyǵan oraı búgin Lev Gýmılev atyndaǵy Eýrazııa ulttyq ýnıversıtetinde «Álemdik fılosofııa damýynyń ózekti máseleleri» atty ІІ Halyqaralyq teorııalyq konferentsııa bastaldy.
J.Ábdildın qazaqstandyq dıalektıka, dıalektıkalyq logıka mektebiniń negizin qalaýshy retinde álemge áıgili. Ol mektep arqasynda adam ǵylymı tanym teorııasynyń, dıalektıkanyń, synı shyǵarmashylyq oılaýdy damytýdyń, adamnyń tulǵa bolyp qalyptasyp, jetilýiniń ózekti máselelerin zertteıdi. Adamzattyń materıaldyq jáne rýhanı mádenıetin alýan túrliligimen jáne qaıshylyqtarymen qosa tutas qamtıtyn, synı shyǵarmashylyq oılaýdyń ámbebap ádisin usynatyn dıalektıka, qazirgi qoǵam ómiriniń barlyq salasyndaǵy qaıshylyqtardyń shıelenisken kezeńinde áli de qajet, áli de ózekti. Sondyqtan ekikúndik konferentsııa aıasynda qarastyrylatyn suraqtar da kóp, santúrli. Onda dıalektıka, dıalektıkalyq logıka jáne tanym teorııasy máseleleri, adam, izgilik jáne mádenıet máseleleri, ǵylym jáne áleýmettik- gýmanıtarlyq tanym ádisnamasy, din jáne bilimniń ózekti suraqtary dıalog túrinde talqylanbaqshy, árıne, bunyń ózi osy suraqtardyń kópshiliktiń pikirtalasyna aınalýyna jáne sheshimin tabýyna jol kórseteri anyq.
Konferentsııa 2013 jyldyń 16 aqpanynda Jabaıhan Múbárakuly Ábdildındi saltanatty quttyqtaý rásimimen aıaqtalady. Bul sharaǵa sheteldik jáne otandyq qurmetti qonaqtar, olardyń ishinde úkimet músheleri, oblys ákimderi, joǵary oqý oryndarynyń rektorlary da qatysady.
