Fılologııa ǵylymdarynyń doktory, professor Tursynbek Kákishulynyń jeke veb-saıty ashyldy
ALMATY. Qazannyń 20-sy. QazAqparat /Erbol Turymbetov/ - Fılologııa ǵylymdarynyń doktory, professor Tursynbek Kákishulynyń jeke veb-saıty ashyldy.Búgin Almatyda saıtty jasaýshylar ǵalymmen kezdesý uıymdastyryp, baspasóz máslıhatyn ótkizdi.
Shara barysynda ǵalymǵa saıt kýáligi tapsyryldy. Óz kezeginde T. Kákishev saıt jasaýshylarǵa alǵysyn bildirip, eńbekterin jarııalaýda bundaı múmkindiktiń bolǵanyna rızalyǵyn jetkizdi.
«Budan buryn ǵalamtordyń qazaqtildi segmentin damytýǵa baılanysty «Báıge» ulttyq ınternet jobasyn uıymdastyrǵan bolatynbyz. Sonyń aıasynda belgili ǵalym Tursynbek Kákishulynyń jeke saıty ashyldy. Jalpy, mádenıetimiz ben ulttyq qundylyqtarymyzdy damytamyz desek, osyndaı ǵalym aǵalarymyzdyń eńbekterin baǵalap, múmkindigimizshe nasıhattaýymyz kerek», - dedi «Báıge» ulttyq ınternet Júldesi» dırektsııasynyń uıymdastyrýshysy Bolat Bóteev.
Saıt domeni - www.kakishev.kz . Onda Halyqaralyq joǵarǵy mektepter akademııasynyń akademıgi, ǵalym T. Kákishulynyń ómirbaıany, sýret-beıne maǵlumattar, suhbattar, maqalalar jarııalanǵan. Sonymen birge, saıt ıesimen tikeleı baılanys jasaýǵa da múmkindik jasalǵan.
Saıttyń ashýshysy ári demeýshisi - T. Kákishevtiń shákirti, Ál-Farabı atyndaǵy QazUÝ-dyń magıstranty Nurdáýlet Nuradil. Onyń aıtýynsha, barlyq maǵlumattar ýaqyt saıyn jańartylyp, tolyqtyrylyp otyratyn bolady.
