Fılmge bıýdjetten jarty mlrd teńge jumsap, 325 adam kórý úshin ǵana túsirdik pe — depýtat
ASTANA. KAZINFORM — Búgin Májilistiń jalpy otyrysynda depýtat Dáýlet Muqaev memleket qarajatyna túsirilgen fılmderdiń sapasyna syn aıtty.
«Kıno — óner. Kıno — bıznes. Kıno — ıdeologııanyń negizgi quraly. 2023 jylǵy 17 maýsymda Memleket Basshysy Qasym-Jomart Toqaev Túrkistan qalasynda ótken Ulttyq quryltaıda otandyq kıno salasyn reformalaý qajet ekenine naqty toqtaldy. Biraq bul saladaǵy aıqaı tolastar emes. Kıno túsirgisi kelgender kóbeıgenmen, olardyń deni óz qarajatyna túsirip jatyr. Memleketten bólinetin qarjynyń kóbi „óz aralarynda“ qalyp jatqandaı kórinedi. Óıtkeni, Ulttyq kınony qoldaý ortalyǵynyń fılmderi ne suranysqa, ne halyqtyń qoldaýyna ıe emes. Tipti, halyq qazynasyndaǵy qarjyny mıllıondap qumǵa quıyp jatqandaımyz. Máselen, 2019-2023 jyldar aralyǵynda otandyq 100 fılmge shamamen 23 mlrd teńge bólingen. Eń qyzyǵy, onyń bári 100 paıyz ıgerilgen. Esebi tapsyrylyp, kıno túsirilgen», — dedi D. Muqaev Mádenıet jáne aqparat mınıstri Aıda Balaevanyń atyna joldaǵan depýtattyq saýalynda.
Onyń aıtýynsha, Atlas entertainment kompanııasy túsirgen otandyq «Vremıa patrıotov» fılmine 1 mlrd qarjy jumsalsa, onyń kassalyq jınaǵy nebári 10 mıllıon teńge. Bul — ketken somanyń 1 paıyzy ǵana.
Sataifilm túsirgen «Boksshy» fılmine 900 mln jumsalsa, kassalyq jınaq nebári 25 mln teńgeni qurady. Kıno óte sapasyz ári kórermenderge áser syılaı almady.
«Sondaı-aq, Medet fılm túsirgen „Leto 1941-go“ otandyq kınosyna 700 mln qarjy bólinse, onyń 2 mıllıony ǵana qaıtarylǵan. Bul ketken shyǵynnan 350 esege az. Munymen qosa, „Jızn“ fılmine 500 mıllıon ketse, nebári 650 myń teńgesi qaıtqan. Mysaly, orta eseppen kınoteatrlardaǵy bılettiń baǵasy 2000 teńgeni qurasa, onda bul fılmdi 325 adam kóripti-mis. Sonda siz bolyp, biz bolyp „Jızn“ degen fılmge bıýdjetten jarty mlrd ketirip, 325 adam kórý úshin ǵana túsirdik pe?! ıAǵnı, memleketten bólingen qarajatqa túsirilgen fılmderdi de halyqtyń kórip qýanyp jatqany shamaly, otandyq kınoóndirýshi uıymdardyń kınoteatrda fılm kórsetýinde taǵy ózindik problema bar. Ol — jarnamanyń álsizdigi, oǵan arnaıy qarajattyń qarastyrylmaýy. Memleket qoldaýymen túsirilgen fılmderdiń jarnamasy joqtyń qasy. Qanshama fılm túsirilip, shań basqan arhıvterde jatyr. Táýelsizdikten beri qaraı memleket qarjysyna 600-den asa fılm túsirilse, sonyń ishinde óz-ózin aqtap, paıdaǵa shyqqan fılm — tek „Dosmuqasan“ ǵana. Bıylǵy Ulttyq kıno ortalyǵynyń pıtchıngti óte sátti uıymdastyrǵanyn kórdik. Fılmder ádiletti ári áleýmettik jelide ashyq tańdaldy. Sondyqtan, jańa basshylyqqa joǵarydaǵy máselelerdi qatań eskerý qajettigin aıtamyz», — dedi depýtat.
Onyń paıymynsha, memleketten qarjylyq qoldaý alýǵa úmitti kınojobalarymen kelgen kınogerlerdi qoldaýdyń jan-jaqty mehanızimin jetildirý qajet.
