Fılmde qarapaıym aýyl turǵynynyń rólin somdaımyn - Netflix fılmine túsken aktrısa

ASTANA. KAZINFORM – Qazaqstandyq akterler Netflix platformasynyń QarLAG týraly jańa fılmine tústi. Túsirilim Ispanııanyń Bılbao qalasynda ótken. Jibek Joly arnasynyń «Búgin LIVE» stýdııasyna qonaq bolǵan Altynaı Nógerbek Halyqaralyq jobada jınaǵan tájirıbesimen bólisti.

- Jalpy bul joba karantınniń aldynda bastalǵan bolatyn. Keıin ártúrli sebeptermen tek 2024 jyly ǵana júzege asty. Karantınge deıin kastıng bolady dep estidik. Oǵan qatystyq, biraq artynan eshqandaı habar bolmady. Keıin kastıng qaıta bastaldy. Aldymen foto synaq jasadyq, keıin beıne synaq jiberdik. Sodan keıin olardan jaýap kúttik, - deıdi aktrısa.

Fılm Qaraǵandydaǵy Spassk lagerine tutqynǵa túsken ıspan ushqyshtary týraly bolmaq.

- Bul kartına Qaraǵandydaǵy Spassk lageri týraly. Onda kóptegen elderden kelgen adamdar jazasyn ótegen. Solardyń ishinde 524 ıspan ushqyshy da bolǵan. Olar soǵys aıaqtalǵannan keıin ǵana eline oralǵan. Degenmen, kóbi qazaq jerinde kóz jumǵan. Bul joba – ıspan halqynyń óz tarıhyna degen qurmeti jáne bizdiń elge degen alǵysy retinde uıymdastyryldy. Óıtkeni Qazaqstan egemendik alǵannan keıin qujattardyń bárin tuńǵysh Prezıdentimiz Ispanııa eline bergen bolatyn. Sol qujattardyń arqasynda kóptegen ıspan azamattary óz ata-babalary týraly habardar boldy. Olardyń ishinde kúndelik jazbalar da kóp bolǵan, - deıdi Altynaı Nógerbek.

QR Eńbek sińirgen qaıratkeri fılmdegi keıipkerlerdiń obrazyna da toqtaldy.

- Bizdiń basty keıipkerimiz – dáriger. Ol soǵysqa deıin dáriger bolyp qyzmet etken, keıin ushqyshtardyń qataryna qosylyp, soǵysqa qatysqan. Stsenarııdegi sıýjetterdiń kóp bóligi sol dárigerdiń kúndeliginen alynǵan. Men bul fılmde qarapaıym aýyl turǵynynyń rólin somdaımyn. Jazasyn ótep jatqan ushqyshtarǵa analyq meıirimimen, qarapaıymdylyǵymen jáne qolda barymen kómektesip júrgen áıeldiń beınesi berilgen. Joba týraly rejıssermen tikeleı sóıleskende, Vıvas «Anar – ol Otan» degen edi. Anar – ushqyshtar úshin týǵan jer, januıa, jyly úı degen uǵymdardyń sımvolyna aınalǵan keıipker, - deıdi ol.

Aktrısa halyqaralyq jobanyń ereksheligin baıandady.

- Bul joba men úshin óte qyzyqty ári paıdaly tájirıbe boldy. Kıno túsirý kóp ýaqyt pen shydamdylyqty talap etedi. Biraq meniń baıqaǵanym – bizde de dál sondaı talantty mamandar, akterler, operatorlar, sýretshiler bar. Bul týraly maqtanyshpen, aýyz toltyryp aıtýǵa bolady. Olar az ýaqytta úlken nátıjege jumys isteıdi. Biraq, bizde kóbinese qaıta óńdeý degen nárse jıi bolady. ıAǵnı belgilengen ýaqyttan tys ta jumys istep jatamyz. Al bul jobada ondaı jaǵdaı bolǵan joq. Eger sahnany túsirip úlgermeı jatsa, eń aldymen bizge qatysty kastıng tobynyń qyz-jigitteri, prodıýser, tipti rejısserdiń ózi aldymyzdan ótip, keshirim surap, taǵy biraz túsirilim jasaýdy ótinedi. Men ol jerde erekshe bir qurmetti baıqadym. Adamdy eń áýeli adam retinde syılaıdy, sodan keıin baryp maman retinde baǵalaıdy. Men ol jerdegi tanymal akterlerdiń juldyz bolyp júrgenin kórgen joqpyn. Olar da biz sııaqty kadrda 100 paıyz jumys isteıdi. Tipti kadrda bolmasa da, óz jumysyna tolyq berilgen, - deıdi QR Eńbek sińirgen qaıratkeri.

Fılm kúzde jaryq kóredi. Al oǵan deıin Halyqaralyq festıvalderge qatysady eken.

- Túsirilim eki kezeńge bólindi. Ol kúz jáne qys mezgilderin qamtyp, tórt aıǵa sozyldy. Fılmniń uzaqtyǵy – shamamen eki saǵat. Bastapqyda túsirilimdi Qaraǵandyda ótkizemiz degen oı bolǵan. Biraq keıin túsirilim tolyqtaı Ispanııada ótti. Fılm kúzde jaryq kóredi. Oǵan deıin halyqaralyq festıvalderge qatysady. Alǵashqy festıvali qyrkúıek aıynda, San-Sebastıan degen ózderiniń qalasynda ótedi. Bul jobaǵa túsirilim toby óte muqııat daıyndaldy desem, artyq aıtqandyq emes. Olar arnaıy Qazaqstanǵa kelip, zertteý jumystaryn júrgizip, barlyǵyn óz kózderimen kórdi, - deıdi stýdııa qonaǵy.

Aktrısa túsirilim barysyndaǵy ókinishimen de bólisti.

- Stsenarııdegi kóptegen epızodtar kadrǵa kirmeı qalýy múmkin. Mysaly, meniń basty keıipkermen qoshtasatyn sahnam kadrǵa kirmeı qaldy. Bul meniń keıipkerim úshin óte ókinishti jaǵdaı boldy. Sebebi óz keıipkerimizdiń obrazyn jasaý úshin biz bar júregimizdi salamyz. Meniń ekrandaǵy ǵumyrym óte qysqa bolǵanymen, osyndaı tarıhı jobanyń bir bóligi bolǵanyma qýanyshtymyn, - deıdi Altynaı Nógerbek.

Eske sala keteıik, Baqyt Qajybaev Qytaıdaǵy ShYU elderi kınofestıvalinde «Úzdik akter» júldesin ıelendi.