Fılıppınniń ońtústigindegi jer silkinisinen qaza tapqandar sany 37 adamǵa jetti
ASTANA. KAZINFORM – Fılıppınniń ońtústigindegi 7,8 baldyq jer silkinisinen qaza tapqandar sany 37 adamǵa jetti, dep habarlaıdy TASS aqparat agenttigi.
Azamattyq qorǵanys basqarmasynyń málimetinshe, barlyǵy 456 adam jaraqat aldy, taǵy tórteýi iz-túzsiz joǵalyp ketti.
Jergilikti bılik Mındanao aralynda mektepter, aýrýhanalar jáne turǵyn úılerdi qosa alǵanda shamamen 1900 ǵımarattyń zaqymdalǵanyn habarlady, olardyń shamamen 1500-i apat saldarynan tolyǵymen qırady.
Heneral-Santos halyqaralyq áýejaıy zaqymdandy, bul reısterdiń toqtatylýyna ákeldi.
Fılıppınniń Azamattyq avıatsııa basqarmasy áskerı, úkimettik jáne gýmanıtarlyq ushaqtardyń áýejaıdy jer silkinisinen keıingi kómek operatsııalary úshin paıdalanýyna ruqsat berdi.
Heneral-Santos qalasynda tótenshe jaǵdaı jarııalandy.
Kazinform úshin arnaıy TASS seriktes agenttigi usyndy.
Eske salsaq, jer silkinisi eldegi memlekettik mektepterde jańa oqý jyly bastalǵan kúni boldy.
Philippine News Agency memlekettik aqparat agenttiginiń málimetinshe, apat shamamen 3,2 mln oqýshyǵa, sondaı-aq 128 myń muǵalim men qyzmetkerge áser etti.
Jer silkinisinen keıin kóp uzamaı Tynyq muhıty tsýnamı týraly eskertý ortalyǵy Fılıppın jaǵalaýynyń keı bólikterinde bıiktigi úsh metrge deıin, al Indonezııa men Malaızııanyń keı bólikterinde bıiktigi bir metrge deıin jetetin tolqyndar bolýy múmkin ekenin eskertti. Keıinirek tsýnamı qaýpi negizinen ótkeni týraly habarlandy.
Japonııada da tsýnamı týraly eskertý jarııalandy, alaıda Japonııa meteorologııalyq agenttigi ony segiz saǵattan keıin joıdy.
Osyǵan deıin Fılıppındegi jer silkinisinen qaza tapqandar sany 32 adamǵa jetkeni habarlanǵan.
