Fılıppınniń burynǵy prezıdenti Manıla áýejaıynda ustaldy

ASTANA. KAZINFORM — Polıtsııa Fılıppınniń burynǵy prezıdenti Rodrıgo Dýterteni Halyqaralyq qylmystyq sottyń sanktsııasy boıynsha Manıla halyqaralyq áýejaıyna qonǵan soń qamaýǵa aldy, dep habarlaıdy VVS. 

— Interpol Manıla búgin tańerteń HKS-tan tutqyndaý týraly orderdiń resmı kóshirmesin aldy. Qazirgi ýaqytta ol (Dýterte) qamaýda otyr, — dep keltirdi AFP prezıdent keńsesiniń málimdemesin. 

Sot Dýterte bılikte júrgende basqarǵan esirtkige qarsy operatsııalarǵa qatysty boljamdy qylmystardy tergep jatyr.

Ol birneshe ret esirtki satýshylarǵa qarsy fızıkalyq kúsh kórsetýge shaqyrdy jáne úsh esirtki satýshyny ózi óltirgenin málimdedi. Onyń eldegi esirtkige qarsy soǵysynda, sonyń ishinde sotsyz jazalaý saldarynan myńdaǵan adam ólýi múmkin edi.

AFP HQS-qa silteme jasap habarlaýynsha, 79 jastaǵy burynǵy prezıdent qýǵyn-súrginge baılanysty adamzatqa qarsy qylmys jasady degen kúdikke ilingen. Quqyq qorǵaýshylardyń aıtýynsha, onyń barysynda ondaǵan myń adam, sonyń ishinde esirtkimen baılanysy dáleldenbegen adamdar qaza tapqan.

Burynǵy prezıdent Manılaǵa qysqa saparmen bolǵan Gonkongtan Cathay Pacific ushaǵymen ushty. Dýterte buǵan deıin sot aldynda jaýap berýge daıyn ekenin aıtqan. 
Dýterteniń burynǵy advokattary qamaýǵa alýdy zańsyz dep atady, dep habarlaıdy Reuters.

Fılıppın Halyqaralyq qylmystyq sot quramynan 2019 jyly Dýterteniń nusqaýymen shyqty, biraq sot onyń buǵan deıin jasalǵan qylmystarǵa, sonyń ishinde Dýterte mer bolǵan Davao qalasynyń ońtústigindegi kisi óltirýlerine qatysty ıýrısdıktsııasy bar ekenin málimdedi. 

Resmı tergeý 2021 jyldyń qyrkúıeginde bastaldy, biraq keıinirek Fılıppın bıligi esirtkige qarsy operatsııalarǵa qatysty júzdegen isti qarap jatqanyn málimdegen soń toqtatyldy.

Іsti qaraý 2023 jyldyń shildesinde bes sýdıadan turatyn alqa Fılıppın bıliginiń sot ıýrısdıktsııasy joqtyǵy týraly qarsylyǵyn qabyldamaǵan soń qaıta jalǵasty.

Osyǵan deıin Fılıppındegi Tramı daýylynan 85 adam qaza tapqany belgili boldy.