Fılıppınge surapyl taıfýn jaqyndap qaldy
NUR-SULTAN. QazAqparat – Tynyq muhıtynyń Marıan araldary aımaǵynda osy aıdaǵy altynshy taıfýn paıda bolyp, saǵatyna 35 km jyldamdyqpen Fılıppınge jaqyndap keledi. Bul týraly seısenbide Japonııanyń ulttyq meteorologııa basqarmasy málimdedi, dep habarlaıdy QazAqparat.
Vedomstvo keme ıeleri men kapıtandaryn osy aımaqtaǵy barynsha qaýipsizdik sharalaryn saqtaýǵa shaqyryp jatyr. Sınoptıkterdiń aıtýynsha, qazirdiń ózinde jeldiń jyldamdyǵy sekýndyna 25 metrge jetedi ári birtindep artýy múmkin.
Taıfýn bıyl Tynyq muhıtta paıda bolǵan 28-shi surapyl daýyl. Buǵan deıin qarasha aıynda alty márte taıfýn bolǵany buryn-sońdy tirkelgen emes. Meteorologtardyń sózine qaraǵande, ádette Tynyq muhıttaǵy taıfýndar jazda jáne kúzdiń basynda bolady.
Aıta keteıik, qarashadaǵy taıfýndar óńirge zor shyǵyn ákelgen joq. Biraq qyrkúıek-qazan aılarynda bolǵan daýyldardan kóptegen adam qaza tapqan. Japonııanyń ózinde «Faksaı» jáne «Hagıbıs» taıfýndarynan 90-nan astam adam opat bolǵan. Aýyl sharýashylyǵy men balyq aýlaý ónerkásibine kelgen zalaldyń kólemi 218 mlrd ıennen ($1,9 mlrd) asyp túsken.
