Fılıppındik baıqaýshy Qazaqstandaǵy saılaýda erekshe ınklıýzıvti jaǵdaı jasalǵanyn atap ótti
ASTANA. KAZINFORM - Fıllıpın Respýblıkasy Saılaý komıssııasynyń admınıstratıvtik qyzmet departamentiniń basshysy Marııa Vına T.Zamora Astana qalasyndaǵy saılaý barysymen tanysty.
Saılaýdyń barysyn sheteldik baıqaýshylar da jiti baqylap, ázirge qandaı da bir buzýshylyqtar anyqtamaǵanyn aıtyp otyr.
Fıllıpın Respýblıkasy Saılaý komıssııasynan kelgen delegat ta saılaýshylardyń tártip pen zańǵa saı daýys berip jatqanyn jetkizdi.
— Quryltaıdyń alǵashqy saılaýynda baıqaýshy bolý biz úshin de tarıhı sát der edim. Búgin, mine tópelep jaýǵan jańbyrǵa qaramastan saılaýǵa jurt asyǵa kelip jatyr. Daýys berý barysy da biz túske deıin barǵan tórt ýchaskede tártippen, tynysh ótip jatyr. Búgin keshki saǵat 20:00-ge deıin saılaýshylardyń joǵary belsendiligin kútemiz. Osy ýaqytqa deıin nusqaýlyqtarǵa, Konstıtýtsııaǵa sáıkes eshqandaı zań buzýshylyqtardy baıqamadyq. Saılaý ýchaskesiniń ishinde eshqandaı úgit-nasıhat jumystaryn kórgenimiz joq. Daýysty satyp alý nemese satý sııaqty áreketterdi baıqamadyq, – deıdi sheteldik baıqaýshy.
Marııa Vına T.Zamora múgedektigi bar adamdardyń daýys berýine erekshe múmkindik jasalǵanyna tańdanysyn jasyra almady.
-Sebebi nashar kóretinderge arnalǵan Braıl shrıfti, partııalarǵa daýys berý nusqaýlyǵyn tyńdaýǵa bolatyn qurylǵylar Fılıppınde ázirge qoldanylmaıdy eken. Sol sekildi syrqattanyp qalǵan adamnyń da daýys berý quqyǵy shektelmeıdi,-dedi ol.
Osyǵan deıin ShYU-nan kelgen baıqaýshy elde Quryltaı saılaýyn baqylaý úshin barlyq jaǵdaı jasalǵannyn aıtty.
