Fılıppındikterdi zombıler qýalap júr
ASTANA. 20 sáýir. QazAqparat - Fılıppınniń Lagýna provıntsııasynda zombılerden qashý jarysy ótti, dep jazady «Alash aınasy». 5000-ǵa jýyq adam qatysqan mundaı erekshe birinshilik álemde buryn-sońdy bolmaǵan.
Reseılik buqaralyq aqparat quraldarynyń habarlaýynsha, Outbreak Manila chempıonatynyń uıymdastyrýshylary jelaıaq atletter men ártisterge jaqsy ermek taýyp bergen. Týrnır úshin zombılerdiń róline 200-ge jýyq akter tańdaldy. Olar aǵashtar men taý tasalaryna jasyryndy. Birinshilik qatysýshylaryna úsh taspa berilgen. «Zombıler» olardy qýyp jetip, taspalaryn tartyp alýy tıis. Úsh taspasynan da aıyrylǵan oıynshy «ajalyn» zombıdiń qansorǵysh aýzynan tapqan bolyp esepteledi de, jarystan shyǵyp qalady. Jelaıaqtarǵa «zombılerdi» urýǵa, áldenemen kesekteýge tyıym salyndy. Uıymdastyrýshylardyń aıtýynsha, bul kim-kimniń de esinen ketpeıtin naǵyz dýman boldy. Zombılerden qashý chempıonaty aldaǵy ýaqytta sporttyń bir túrine aınalýy múmkin.
