Fılıppındegi taıfýn saldarynan qurban bolǵandar 10 myńnan asty
ASTANA. 10 qarasha. QazAqparat - Fılıppındik polıtsııanyń habarlaýynsha, «Haııan» taıfýnynyń saldarynan qurban bolǵandardyń sany 10 myńnan asyp tústi. Bul týraly VVS habarlady.
Osyǵan deıin 1200 adamnyń ómiri qıylǵandyǵy habarlanǵan bolatyn, alaıda jeksenbige qaraǵan túnde tek Leıte provıntsııasynyń ózinde qaza bolǵandardyń sany 10 myńnan asqandyǵy týraly habar kelip tústi. Jergilikti bıliktiń málimetinshe, «Haııan» taıfýny júrip ótken osy provıntsııada 80 paıyzǵa deıingi kólemde barsha qurylystar men kommýnıkatsııalar buzylǵan. Atalǵan tropıkalyq taıfýn eń qaýatty tabıǵı apattardyń sanatyna jatqyzylyp otyr. Ol Fılıppınniń jaǵalaýynda tutas eldi mekenderdi jermen-jeksen etti. Taıfýn jaqyndaǵan kezde bılik jaǵalaýdaǵy birneshe myń adamdy qaýipsiz jerge kóshirdi. Biraq ta eldiń ortalyq aýdandary da alapat apattyń saldarynan zardap shegip otyr. Taıfýn oshaǵyndaǵy jeldiń jyldamdyǵy saǵatyna 300 shaqyrymǵa deıin jetken kórinedi.
