Fılıppındegi «Naldjı» daýylynyń qurbandary 152 adamǵa jetti
BANGKOK.TASS-QazAqparat – Fılıppındegi «Naldjı» tropıkalyq daýylynan 4,12 mıllıonnan astam adam zardap shekti. Tabıǵat apatynan 152 adam kóz jumdy. Bul týraly Qaýiptiń aldyn alý jáne tabıǵı apattardy joıý ulttyq keńesiniń jumada jarııalanǵan esebinde aıtylǵan, dep habarlaıdy QazAqparat TASS agenttigine silteme jasap.
Vedomstvonyń málimetinshe, 1186 evakýatsııa ortalyǵynda 1,03 mıllıon adam ornalastyrylǵan. 355,4 myńnan astam adam úılerinen aldyn ala ketip qalǵan. Kem degende 128 adam túrli dene jaraqatyn alǵan, 35-i iz-túzsiz joǵalyp ketken. Respýblıkanyń 13 óńirinde sý tasqyny men kóshkinderdi qosa alǵanda, apatqa baılanysty 1,51 myń oqıǵa tirkelgen.
Daýyl 22,4 myń úıge zaqym keltirip, 2,62 myń úıdi joıǵan. 391 ınfraqurylymdyq nysanǵa keltirilgen zalal 2,91 mıllıard pesoǵa (49,63 mıllıon dollar) baǵalanyp otyr. Apat saldarynan 504 jol men 120 kópir búlingen. 359 qalada elektr qýatynda aqaýlar shyqqan, biraq 234 qalada ol qalpyna keltirildi, 38 mýnıtsıpalıtette baılanys jaǵynan, 11 qalada sýmen jabdyqtaýda aqaýlar bar.
666 oqý ornynda sabaq jáne 233 kásiporynda jumys toqtatyldy. 437 qala tótenshe jaǵdaıda. Aýyl sharýashylyǵyna keltirilgen shyǵyn 2,74 mıllıard pesoǵa (46,79 mıllıon dollar) baǵalanyp otyr. Úkimet kómekke 149,9 mıllıon peso (2,55 mıllıon dollar) bóldi.
