Fılıppındegi joıqyn jer silkinisinen qaza tapqandar sany 78 adamǵa jetti
ASTANA. KAZINFORM – Fılıppınniń ońtústigindegi Mındanao araly jaǵalaýynda 8 maýsymda bolǵan magnıtýdasy 7,8 bolatyn joıqyn jer silkinisinen qaza tapqandar sany keminde 78 adamǵa jetti. Taǵy 30 adam iz-túzsiz joǵalyp ketken, dep habarlaıdy Sınhýa agenttigi.
Bul týraly beısenbi kúni Tabıǵı apattar qaýpin azaıtý jáne olardyń saldaryn joıý jónindegi ulttyq keńes málimdedi.
Keńestiń dereginshe, jer silkinisi 357 myńnan astam úı sharýashylyǵyna nemese shamamen 1,5 mıllıon adamǵa áser etken. Qazirgi ýaqytta 47 evakýatsııalyq ortalyqta 22 myńǵa jýyq adam ornalastyrylǵan.
Shamamen 74,7 myń turǵyn úı zaqymdanǵan, onyń ishinde 13,7 myńy tolyq qıraǵan. Jalpy sany 774 ınfraqurylym nysany búlinip, keltirilgen shyǵyn kólemi 1,29 mıllıard fılıppın pesosyn (shamamen 21,3 mıllıon AQSh dollary) qurady.
Aýyl sharýashylyǵyna keltirilgen shyǵyn 29,8 mıllıon pesoǵa (shamamen 493 myń AQSh dollary) baǵalanyp otyr.
Fılıppınniń Výlkanologııa jáne seısmologııa ınstıtýtynyń málimetinshe, tektonıkalyq jer silkinisi 8 maýsym kúni jergilikti ýaqytpen saǵat 07:37-de tirkelgen.
Jerasty dúmpýleriniń epıtsentri Mındanao aralyndaǵy Saranganı provıntsııasynyń Maasım qalasynan ońtústik-batysqa qaraı 32 shaqyrym jerde ornalasqan. Jer silkinisiniń oshaǵy 33 shaqyrym tereńdikte bolǵan.
Fılıppınde seısmıkalyq belsendilik jıi baıqalady, óıtkeni el «Tynyq muhıtynyń otty beldeýi» dep atalatyn aımaqta ornalasqan. Tektonıkalyq plıtalardyń túıisý aımaǵy bolyp sanalatyn bul óńir jıi jer silkinisteri men janartaý atqylaýlarymen erekshelenedi.
Eske sala ketsek, 8 maýsym kúni Fılıppınde 7,8 baldyq zilzaladan keıin tsýnamı qaýpi jarııalanǵanyn jazdyq. Odan keıin jer silkinisinen qaza tapqandar sany 55-ke jetkeni habarlandy.
