Fılıppındegi jer silkinisinen qaza tapqandar sany 32 adamǵa jetti
ASTANA. KAZINFORM — Fılıppınde bolǵan jer silkinisi saldarynan qaza tapqandar sany 32 adamǵa deıin ósti. Buǵan deıin 12 adamnyń qaza tapqany jáne 200-ge jýyq adamnyń jaralanǵany habarlanǵan bolatyn, dep jazdy BELTA.
Inquirer portalynyń málimetinshe, Fılıppın Bilim mınıstrliginiń deregine sáıkes, Mındanao aralynda bolǵan jer silkinisi men keıingi aftershok saldarynan bes óńirde ornalasqan 6224 mektep zardap shekken. Bul oqý oryndarynda 3,2 mıllıonnan astam oqýshy bilim alady, sondaı-aq 128 myńnan astam muǵalim men qyzmetker jumys isteıdi.
Mınıstrlik taratqan málimdemede zardap shekken aımaqtardaǵy sabaqtar oqýshylardyń, muǵalimder men mektep qyzmetkerleriniń qaýipsizdigin qamtamasyz etý maqsatynda qosymsha habarlamaǵa deıin toqtatylǵany aıtylǵan.
Bilim mınıstri Sonnı Angara barlyq zardap shekken mektepterde qaýipsizdik tekseristerin júrgizýdi jáne shuǵyl kómek kórsetýdi, sondaı-aq shyǵyndy baǵalaý úshin qurylys ınjenerlerin jiberýdi tapsyrdy.
Búgin, 8 maýsymda Fılıppınniń ońtústik jaǵalaýynda magnıtýdasy 7,8 bolatyn jer silkinisi tirkeldi. Jerasty dúmpýleri ǵımarattardyń qıraýyna sebep bolyp, jaǵalaý mańynda bıiktigi bir metrge deıin jetetin tsýnamı tolqyndary baıqaldy. Eń qatty zardap shekken eldi mekenderdiń biri — Mındanao aralyndaǵy General-Santos qalasy.
Eske sala keteıik, búgin Fılıppınde 7,8 baldyq zilza bolyp, artynsha tsýnamı qaýpi jarııalandy.
