Fılıppındegi mektepte atys bolyp, alty adam qaza tapty
ASTANA. KAZINFORM – Fılıppınniń ońtústigindegi orta mektepte atys bolyp, alty adam qaza tapty, taǵy 17 adam jaraqat aldy, dep habarlaıdy Sınhýa.
Oqıǵa juma kúni túski ýaqytta Ońtústik Kotabato provıntsııasynyń Banga mýnıtsıpalıtetindegi orta mektepte bolǵan.
Eldiń Áleýmettik qamsyzdandyrý jáne damý mınıstrliginiń málimetinshe, oqıǵa ornyna áleýmettik qyzmetkerler jiberilip, zardap shekkender men olardyń jaqyndaryna psıhologııalyq kómek kórsetilgen.
– Áleýmettik qyzmetkerler oqıǵa ornynda psıhologııalyq kómek pen qajetti qoldaý kórsetti, – dep málimdedi vedomstvo.
Jergilikti tabıǵı apattar qaýpin azaıtý jáne basqarý basqarmasynyń dereginshe, oqıǵadan keıin Banga mýnıtsıpalıtetindegi barlyq bilim berý mekemelerinde sabaq dereý toqtatylǵan.
Fılıppınniń Bilim mınıstrligi mekteptegi atys týraly aqparatqa baılanysty alańdaýshylyq bildirdi.
Buǵan deıin bıylǵy tamyz aıynda Fılıppınniń ońtústigindegi orta mektepterdiń birinde bolǵan atystan eki oqýshy qaza tapqan. Olardyń biri oq atqan jasóspirim bolǵan.
Aıta keteıik, AQSh-ta saıabaqtaǵy atystan bir polıtseı qaza taýyp, taǵy biri jaralandy.
