Fılıppındegi apat: 7,8 baldyq zilzaladan keıin tsýnamı qaýpi jarııalandy
ASTANA. KAZINFORM – Fılıppın ońtústiginde bolǵan 7,8 baldyq jer silkinisinen úsh adam qaza taýyp, tórteýi jaraqat aldy, dep habarlaıdy TASS aqparat agenttigi.
Fılıppın Ulttyq polıtsııasynyń málimetinshe, Mındanao aralynyń soltústiginde jáne ortalyǵynda mektepter, aýrýhanalar jáne turǵyn úılerdi qosa alǵanda 37 ǵımarat zaqymdalǵan.
Zardap shekken aýdandarda polıtsııa qyzmetkerleri jumyldyryldy. Olar halyqqa kómek kórsetýde, sondaı-aq keltirilgen zalaldy baǵalaý jumystary jalǵasyp jatyr.
Fılıppın prezıdenti kishi Ferdınand Markos jer silkinisi bolǵan Mındanaonyń ońtústik jaǵalaýynyń birneshe aýdanynda sabaqty toqtatýdy buıyrdy. Memleket basshysy sonymen qatar úkimettik vedomstvolarǵa tabıǵı apat saldaryn joıý jumystaryn úılestirýdi, gýmanıtarlyq kómek kórsetýdi jáne evakýatsııalyq ortalyqtardyń jumysyn qamtamasyz etýdi tapsyrdy.
Heneral-Santosta jer silkinisi birneshe ǵımarattyń qulaýyna ákeldi. Araldyń keı aýdandarynda elektr qýatynyń úzilýi týraly habarlandy. Heneral-Santos áýejaıynyń jumysy da toqtatyldy. Fılıppın janartaýtaný jáne seısmologııa ınstıtýty tsýnamı týraly eskertý jarııalady.
Osyǵan deıin Fılıppınde salynyp jatqan kópqabatty ǵımarat qulap, adamdar mert bolǵany habarlanǵan edi.
