Fılıppınde jyldamdyǵy 87 m/s bolatyn «Haııan» taıfýny uıytqyp tur
ASTANA. 8 qarasha. QazAqparat - Fıllıpın halqyn «Haııan» taıfýny ábigerge salýda. Mamandardyń paıymdaýynsha, bul daýyl meteobaqylaýlar tarıhyndaǵy eń qýattysy bolmaq. Tipti rekordty «Kamılla» men «Allennen» da asyp túsetin túri bar.
«Haııan» taıfýnynyń kúshi jaǵalaýǵa jetkende sekýndyna 87 metrdi qurady. Jeldiń ekpini 105 metrdi kórsetken. Salystyrý úshin «Kamılla» men «Allen» taıfýndarynyń kúshi sekýndyna 84,7 metr bolǵanyn atap óteıik.
Kesapat tıgen aýdandardan turǵyndar jappaı qaýipsiz jerge kóshirildi, dep habarlaıdy newsru. com. Dúleı daýyl Fılıppınniń astanasy Manılýǵa jetpeıdi dep boljanýda.
Weather Underground amerıkandyq jekemenshik meteorologııalyq kompanııasynyń mamany Djeff Masterstiń pikirinshe, daýyldyń shyǵyny qısapsyz bolmaq. Degenmen, sarapshynyń aıtýynsha, daýyl qatty jyldamdyqpen kele jatyr, sondyqtan jaýyn-shashynsyz óte shyǵýy da múmkin. Fıllıppınde adamdar kóbinese jaýyn-shashyny aralas daýyldardan qaza bolyp jatady. Sondyqtan adam shyǵyny az bolýy múmkin dep boljaıdy amerıkandyq meteorolog.
Boljam boıynsha, «Haııan» taıfýny búgin-erteń osy aralda uıytqyp, keıin Vetnam men Laosqa qaraı aýysady.
