Fılıppınde jer silkinisinen qaza tapqandar sany 70-ke jaqyndady
ASTANA. KAZINFORM — Fılıppın ortalyǵyndaǵy Sebý provıntsııasynda bolǵan kúshti jer silkinisi saldarynan kem degende 69 adam qaza tapty, dep habarlaıdy Al Jazeera.
Resmı ókilderdiń aıtýynsha qaza tapqandar sany artýy múmkin, óıtkeni qaıta-qaıta jaýǵan jaýyn, kópirler men joldardyń zaqymdanýy adam ómirin qutqarý jumystaryna kedergi keltirip otyr.
— Biz áli de izdestirý-qutqarý operatsııasynyń altyn saǵatyndamyz. Úıindiler astynda qalǵan nemese zardap shekken adamdar týraly áli de kóptegen habarlama túsip jatyr, — dep málimdedi Azamattyq qorǵanys basqarmasy basshysynyń orynbasary Bernardo Rafaelıto Alehandro.
Zardap shekken qalalar men eldi mekenderdegi mektepter men memlekettik mekemeler jabyldy. Fılıppındik výlkanologııa jáne seısmologııa ınstıtýtynyń dırektory Teresıto Bakolkoldyń aıtýynsha, seısenbi kúni keshke jer silkinisi bolǵannan beri 600-den astam dúmpý tirkelgen.
Ol qatty jer silkinisinen keıin jańbyrly taý betkeıleri kóshkin men selge kóbirek beıim bolatynyn eskertti.
Jer silkinisi aımaqta «Býaloı» jáne «Ragasa» daýyldary soqqannan keıin bir apta ótpeı boldy.
Fılıppın — álemdegi apatqa beıim elderdiń biri, ol muhıt aınalasyndaǵy seısmıkalyq buzylý doǵasy — Tynyq muhıtynyń órt saqınasynda ornalasýyna baılanysty jer silkinisi men janartaý atqylaýynan jıi zardap shegedi. Budan basqa, arhıpelagqa jyl saıyn shamamen 20 taıfýn men daýyl soǵady.
Buǵan deıin Fılıppınde magnıtýdasy 6,9 bolatyn jer silkinisi tirkelgenin jazǵan edik.
