Fılıppınde Vongfong taıfýnyna baılanysty ondaǵan myń adam evakýatsııalandy
MANILA. QazAqparat – Fılıppın bıligi saǵatyna 115 mıl jyldamdyqpen kelgen Vongfong (Vongfong) taıfýnyna baılanysty ondaǵan myń adamdy evakýatsııalaýǵa májbúr boldy. Qazirgi ýaqytta elde koronavırýstyń taralý qaýpi saldarynan qatań oqshaýlaný rejımi engizilgeni atalyp ótildi, dep habarlaıdy QazAqparat CNN-ge silteme jasap.
Taıfýn jergilikti ýaqyt boıynsha beısenbi kúni túste Samar aralynyń shyǵys bóliginde boldy. Bul - Tynyq muhıtynyń batys bóliginde bıyl bolǵan birinshi taıfýn.
Fılıppın ýaqyty boıynsha juma tańǵy saǵat 8-degi jaǵdaı boıynsha Fılıppın atmosferalyq, geofızıkalyq jáne astronomııalyq qyzmetter basqarmasy sońǵy ret taıfýnnyń San-Andres qalasynyń jaǵalaýynda saǵatyna 9 mıl jyldamdyqpen soltústik-batysqa qaraı bara jatqanyn málim etti.
San-Andres Lýson aralynda ornalasqan. Ol el astanasynan ońtústik-shyǵysqa qaraı shamamen 140 mıl (225 kılometr) qashyqtyqta ornalasqan.
Zardap shekken Samar aýdanyna jaqyn mańda 200 myń adam turatyny habarlandy.
Koronavırýs pandemııasyna baılanysty engizilgen shekteý sharalary jappaı evakýatsııalaý protsesin qıyndatyp jatyr.
Fılıppınde qazirgi ýaqytta 50 mıllıonnan astam adam qatań oqshaýlaný rejıminde ómir súrip jatyr, Djon Hopkıns ýnıversıtetiniń málimetinshe, elde 11 876 adam aýrý juqtyrǵan.
Foto: efe.com
