Fılıppınde tropıkalyq daýyldan 120-ǵa jýyq adam kóz jumdy
NUR-SULTAN. QazAqparat – Fılıppınde «Megı» tropıkalyq daýyly 115 adamnyń ómirin qıdy, dep habarlaıdy QazAqparat tilshisi.
Fılıppınniń Tabıǵı apattardyń aldyn alý jáne saldaryn joıý jónindegi ulttyq keńesiniń málimetinshe, selden 920 myńnan astam adam zardap shekken. 230 myńnan astam adam úılerin tastap ketýge májbúr bolǵan. Resmı túrde 150-den astam adam habar-osharsyz ketken.
14 sáýirdegi jaǵdaı boıynsha 115 adamnyń máıiti tabylǵan. Tsıklon Fılıppın teńizindegi konvektsııa aımaǵynan shyǵyp, soltústik-batysqa qaraı Leıte shyǵanaǵyna qaraı jyljı bastaǵan. Jeksenbide eldiń ortalyq-shyǵys bóligindegi Samar jáne Leıte provıntsııalarynyń araldarynda daýyl soqty. Jeldiń maksımaldy jyldamdyǵy onyń sheginde 20,8 m/s, ekpini 29,1 m/s-qa deıin jetti. Daýyldyń sońy nóser jańbyrǵa, aýqymdy sý tasqyny men kóshkinge ulasty.
Apat saldarynan Shyǵys Vısaı araldarynyń ózge de óńirleri zardap shekti. Aýyl sharýashylyǵyna – kúrish, júgeri, mal sharýashylyǵyna orasan zor zııan keldi. Daýyl saldarynan eldiń 15 qalasynda elektr qýaty úzilip, eki qalada sý qubyry, joldar men kópirler zaqymdandy.
38 port jumysyn toqtatty. Fılıppın bıligi «Megı» daýylyna baılanysty 14 qala men mýnıtsıpalıtette tótenshe jaǵdaı rejımin jarııalady. Aldyn ala resmı derekter boıynsha jalpy shyǵyn 10,9 mln AQSh dollarynan asqan.
Avtory: Narymbek Ismagýlov
