Fılıppınde taıfýnnan qaza tapqandar sany 389 adamǵa jetti, 64-i iz-túzsiz joǵalǵan
BANGKOK. QazAqparat – Tynyq muhıtyndaǵy «Raı» taıfýnynan mert bolǵandar sany 389 adamǵa jetti. Bul týraly dúısenbi kúni Philippine News Agency málim etti, dep habarlaıdy QazAqparat.
Onyń dereginshe, 1146 adam zardap shegip, 64-i iz-túzsiz joǵalǵandar tiziminde. Munyń ústine 4,2 mln turǵyn úılerin tastap ketýge májbúr bolǵan.
Fılıppın bıligi zardap shegýshilerge kómek kórsetý úshin 1,1 myńnan astam evakýatsııalyq ortalyq uıymdastyrdy. Taıfýn respýblıkanyń ınfraqurylymy men aýyl sharýashylyǵyna sáıkesinshe 16,7 mlrd peso ($332,8 mln) jáne 5,3 mlrd peso ($105,6 mln) zalal keltirgen. Budan bólek, taıfýn 167 myń turǵyn úıdi tolyqtaı qıratqan.
Gonkongtyń meteorologııalyq observatorııasy 16 jeltoqsanda bıylǵy maýsymdaǵy «Raı» dep atalatyn 22-shi taıfýn Tynyq muhıtynyń batys bóliginde qalyptasqanyn habarlaǵan bolatyn. 22 jeltoqsanda Fılıppın prezıdenti Rodrıgo Dýterte birneshe óńir aýmaǵynda bir jylǵa tótenshe jaǵdaı rejımin engizgenin jarııalady.
