Fılıppınde sý tasqynynan qaza tapqandar sany 29 adamǵa jetti
BANGKOK. TASS – QazAqparat – Fılıppınde sý tasqyny saldarynan kem degende 29 adam qaza tapty, 4 adam iz-túzsiz ketti. Seısenbide taratylǵan Tabıǵı apattyń aldyn alý jáne joıý jónindegi keńestiń esebinde aıtylǵandaı, qolaısyz aýa raıy respýblıkanyń 14 aımaǵynda 1,39 mıllıonnan astam adamǵa zııan keltirgen. Buǵan deıin 28 adamnyń qaza tapqany týraly málim etilgen edi, dep habarlaıdy QazAqparat TASS-qa silteme jasap.
Vedomstvonyń málimetinshe, 203,3 myń adam 484 evakýatsııalyq ortalyqqa ornalastyrylǵan. Kem degende 14,1 myń adam úılerin tastap ketip, 12 azamat túrli jaraqat aldy. 14 óńirde sý tasqyny men kóshkinge baılanysty myńnan astam oqıǵa tirkeldi.
Apat 1,37 myń úıge (quny 2,41 mıllıon peso (43,8 myń dollar) zaqym keltirdi. 156 ınfraqurylymdyq nysanǵa keltirilgen zalal 171,5 mln pesoǵa ($3,13 mln), aýyl sharýashylyǵyna - 399,5 mln pesoǵa (7 7,29 mln) baǵalanyp otyr. Sý tasqyny 238 jol men 55 kópirge zaqym keltirdi, 26 teńiz portynyń jumysyna kedergi bolǵan.
555 qala men 134 mýnıtsıpalıtette oqý oryndaryndaǵy sabaqtar men kásiporyndardaǵy jumys toqtatyldy. 32 eldi mekende apat rejımi engizildi. Úkimet kómek kórsetýge 74,5 mln peso ($1,36 mln) bólip otyr.
Foto: Philippine Coast Guard/ Handout via REUTERS
