Fılıppınde salynyp jatqan kópqabatty ǵımarat qulap, adamdar mert boldy
ASTANA. KAZINFORM - Fılıppınniń Anheles qalasynda qurylysy júrip jatqan kópqabatty ǵımarat qulady, dep habarlaıdy ALJazeera.
Qazirgi tańda úsh adamnyń mert bolǵany belgili, taǵy 17 adam iz-túzsiz ketkender qatarynda.
Qutqarýshylar óte qıyn jaǵdaıda jumys istep jatyr. Kez-kelgen ýaqytta ǵımarattyń qalǵan bólikteri qulaýy múmkin. Sol sebepti mamandar jumystyń kóbin qolmen atqaryp jatyr.
Teplovızorlardyń kómegimen qırandylar astynda adamdar jatqany belgili boldy. Soǵan qaraı izdeý jumystary jalǵasyp jatyr.
Bılik nysan ıesin anyqtap, apattyń shyǵý sebepterin tekserýge kiristi. Al qurylysshylardyń týystary jedel aqparat berýdi talap etip otyr. Alaıda qutqarýshylardyń qaýipsizdigine tóngen qater izdeý jumystaryn baıaýlatyp otyr.
Osyǵan deıin Qytaıda shahta apat bolyp, 82 adam qaza bolǵanyn jazdyq.
