Fılıppınde prezıdenttik saılaý bastaldy
ASTANA. QazAqparat - Fılıppın Respýblıkasynda prezıdent, vıtse-prezıdent, senatorlar jáne 18 myńǵa jýyq jergilikti sheneýnikter saılaýy bastaldy.
Prezıdenttik oryntaqqa bes úmitker talasýda. Saýalnama nátıjesine qaraǵanda, 22 jyldan astam ýaqyt Davao qalasynyń meri bolǵan Rodrıgo Dýerte kósh bastaýda.
7 myń araldan turatyn elde 54 mln saılaýshy tirkeldi.
Qazirgi sátte Fılıppın kóshbasshysy 2010 jyly saılaýda jeńiske jetken Benıgno Akıno bolyp otyr.
Elde qaýipsizdik sharasy kúsheıtildi, alaıda, jergilikti BAQ-tyń habarlaýynsha, Kavıte provıntsııasynda belgisiz bireýlerdiń birneshe kólikke oq jaýdyrýy saldarynan jeti adam qaza tapqan. Ázirge shabýyldy kim jasaǵany belgisiz.
Budan buryn saılaýaldy naýqanda 15 adam qaza tapty. Senbide merge úmitkerlerdiń birin eldiń ońtústiginde óltirip ketken.
