Fılıppınde paromdaǵy órtten qaza tapqandar sany 76 adamǵa jetti
ASTANA. KAZINFORM — Fılıppınniń batysyndaǵy Palavan provıntsııasy jaǵalaýynda jolaýshylar paromynan órt shyǵyp, qaza tapqandar sany 76 adamǵa jetti. Taǵy 13 adam habar-osharsyz ketkender qatarynda. Bul týraly senbi kúni Fılıppın jaǵalaý kúzeti (PCG) málimdedi, dep jazady Anadolu.
PCG taratqan málimdemege sáıkes, «MV June Aster» kemesinen taǵy 41 máıit tabylǵan. Olardyń barlyǵy túgelimen órtenip ketken. Osylaısha, órtten kóz jumǵandardyń sany 35-ten 76 adamǵa deıin ósti.
Vedomstvonyń habarlaýynsha, máıitter jeksenbi kúni «BRP Cape Engano» kemesine jetkiziledi dep josparlanǵan.
Jaǵalaý kúzetiniń málimetinshe, aman qalǵandar sany 43 adam bolyp otyr.
Keme jolaýshylarynyń tiziminde barlyǵy 134 adam bolǵan. Olardyń 13-i áli habar-osharsyz ketkender qatarynda. Al tizimde bolǵan eki adam paromǵa minbegenin málimdegen. Bılik máıitterdi izdeý jáne anyqtaý jumystary jalǵasqan saıyn bul derekter ózgerýi múmkin ekenin atap ótti.
«June Aster» kemesi Manıladan Palavan aralyndaǵy Koron qalasyna baǵyt alǵan. Sársenbi kúni keshke kemede órt shyqqan.
Alǵashqy málimet boıynsha bortta 117 jolaýshy men 17 ekıpaj múshesi bolǵan.
Sársenbi kúni keshke 5 adamnyń kóz jumǵany rastalyp, 43 jolaýshy men ekıpaj múshesi qutqarylǵan. Keıin órt sóndirilip, kemeniń qaýipsizdigi tekserilgennen keıin bılik órtengen kemeden taǵy 30 adamnyń denesin alyp shyqty.
Aıta keteıik, Zımbabvedegi Karıba sý qoımasynda 11 tamyz kúni parom apatqa ushyrady. Saldarynan 72 adam mert boldy.
