Fılıppınde órt saldarynan 8 adam mert boldy
MANILA. BBC. QazAqparat – Fılıppınde bolǵan órt saldarynan 8 adam mert boldy, olardyń arasynda balalar da bar, dep habarlaıdy QazAqparat BBC agenttigine silteme jasap.
Jergilikti bılik ókilderiniń habarlaýynsha, Fılıppın astanasy Manıla mańyndaǵy kóptegen úılerde bolǵan órt saldarynan 8 adam qaza tapqan, onyń 6-ýy balalar.
Jergilikti ýaqyt boıynsha tańǵy saǵat 05-00-der kezinde bastalǵan órttiń saldarynan 80 úı janyp ketti. Qaıǵyly jaǵdaı Keson-Sıtıde ornalasqan Fılıppın ýnıversıtetiniń keń aýqymdy kampýsynyń ishindegi turǵyndar tyǵyz qonystanǵan aýyldaǵy turǵyn úıdiń ekinshi qabatynan bastaldy.
Órttiń neden shyqqany ázirge belgisiz.
Órt sóndirýshi ofıtser Greg Bıchaıda AFP aqparat agenttigine órtti sóndirýge eki saǵat astam ýaqyt ketkenin habarlady.
«Órttiń jyldam taraǵany sonshalyq zardap shekkender úılerinen shyǵyp úlgermedi»,-dedi ol.
Sondaı-aq onyń sózinshe, mert bolǵandardyń 6-ýy bala, alaıda olardyń naqty jasyna qatysty aqparat taratylmaı otyr.
«Mundaǵy úıler jeńil materıaldardan salynǵan. Órt shyqqan kezde adamdar ne isterin bilmeı abdyrap qaldy. Bizdiń stantsııamyz jaqyn bolǵanymen olar bizge habarlasa almady»,-dedi Bıchaıda.
Aıta keteıik, Fılıppın álemdegi halyq eń tyǵyz ornalasqan memleketterdiń biri.
Myńdaǵan adam halyq shekten tys tyǵyz ornalasqan aımaqtarda turady jáne onda órt oqıǵalary jıi bolyp turady.
