Fılıppınde «órmekshi adam» - Alen Rober bıik ǵımaratqa shyqqany úshin ustaldy
ASTANA. QazAqparat - Frantsýzdyq bıikke órmeleýshi, kópshilikke «órmekshi adam» retinde tanylyp ketken Alen Rober seısenbi kúni Fılıppındegi Makatı qalasynda záýlim ǵımaratqa shyqqannan keıin ustaldy. Bul týraly Philippine Daily Inquirer gazeti jazdy.
Basylymnyń deregi boıynsha, Rober bıiktigi 217 metrden asatyn G.T. International Tower munarasyna shyqqan. Bul ǵımarat eldegi eń bıik úılerdiń ondyǵyna kiredi. Frantsýz munaraǵa shyǵýdy jergilikti ýaqytpen 10:40-ta bastady.
Bıikke shyqqan «órmekshi adamdy» polıtsııa kútip turdy. Keıin ony bólimshege alyp ketti. CNN telearnasy habarlaǵandaı, Roberge ǵımaratqa zańsyz kirip, qoǵamdyq tártipti buzǵany úshin aıyp taǵylýy múmkin.
Rober budan buryn arnaıy qorǵanys quraldarynsyz bıik ǵımarattarǵa shyǵýdaǵy jetistigi úshin Gınnestiń rekordtar kitabyna engen edi.
