Fılıppınde laı kóshkin 7 adamnyń ómirin qıdy

ASTANA. KAZINFORM — Fılıppınniń ońtústiginde tolassyz jaýǵan jańbyr saldarynan laı kóshkin júrip, 7 adam kóz jumdy, dep habarlaıdy BELTA.

Elde tolassyz jaýǵan jańbyrdyń kesirinen eki márte kóshkin júrip ótti. Fılıppınniń ońtústik-shyǵysynda sý tasqynynan 3 myńnan astam aýyl turǵyny úılerin tastap ketýge májbúr boldy.

Shyǵys Davao provıntsııasynyń jaǵalaýyndaǵy Matı qalasynda kóshkin bir úıdi basyp qalyp, erli-zaıypty men olardyń eki qyzy qaıtys boldy. Bul týraly tótenshe jaǵdaılar qyzmeti men provıntsııalyq bılik ókilderi habarlady.

— Qutqarýshylar qaza tapqandardyń máıitin shyǵarý úshin jer qazý tehnıkasyn paıdalandy, — dedi azamattyq qorǵanys basqarmasynyń aımaqtyq dırektory Ednar Daıanhırang.

Davao-de-Oro provıntsııasynyń altyn óndiretin Monkaıo qalasyn beısenbi kúni keshke qaraı kóshkin basyp qalǵan. Onda úsh adam mert bolyp, máıitter úıindiler arasynan tabyldy.

Daıanhırangtyń málimetinshe, sońǵy kúnderi qatty jaýǵan jańbyrdan 10 myńǵa jýyq adam zardap shekti, onyń ishinde 3 200-den astamy ýaqytsha baspanalarǵa kóshýge nemese týystarynyń úıinde turýǵa májbúr boldy.

— Birneshe shalǵaı provıntsııalar men qalalarda mektepter men mekemelerdiń jumysy toqtatyldy, — dep qosty ol.

Sınoptıkterdiń aıtýynsha, qatty jańbyr men naızaǵaı ádette maýsym aıynda bastalatyn taıfýnnan buryn bolǵanyn jáne sýyq jeldiń Tynyq muhıtynan keletin jyly jáne ylǵaldy aýamen ózara árekettesýinen týyndaǵan.

Jyl saıyn jer silkinisi men janartaý atqylaýy jıi bolatyn Tynyq muhıtyndaǵy «Otty saqına» dep atalatyn Fılıppın arhıpelagynda shamamen 20 taıfýn men tropıkalyq daýyl soǵady. Bul Ońtústik-Shyǵys Azııa memleketin álemdegi apatqa beıim elderdiń birine aınaldyrady.

Byltyr qarasha aıynda Fılıppındegi taıfýnnan 200-den astam adam mert boldy. Eldiń astan-kesteńin shyǵarǵan «Kalmaegı» taıfýnynan 2,9 mıllıon adam zardap shekti.