Fılıppınde tsýnamı qaýpi týraly eskertý jarııalandy
ASTANA. KAZINFORM — Fılıppın jaǵalaýynda 7,4 baldyq jer silkinisi boldy. Bul týraly TASS aqparat agenttigi atalǵan eldiń výlkanologııa jáne seısmologııa ınstıtýtyna siltememen habarlady.
Oqıǵa jergilikti ýaqyt boıynsha 9:43–te (Astana ýaqytymen 6:43) bolǵan, ázirge adamdardyń zardap shekkeni jáne nysandardyń qıraǵany týraly aqparat túsken joq.
Výlkanologııa jáne seısmologııa ınstıtýty magnıtýdasy 2,6-dan 4,9-ǵa deıingi dúmpýlerdi tirkeýdi jalǵastyryp jatyr.
Vedomstvo sonymen qatar Shyǵys Davao, Shyǵys Samar, Ońtústik Leıte jáne Soltústik Sýrıgao provıntsııalaryna tsýnamı qaýpi týraly eskertý jasap, jaǵalaýdaǵy aýdandardyń turǵyndardy tez arada bıik jerlerge evakýatsııalanýdy usyndy.
GMA News telearnasynyń habarlaýynsha, Davao aımaǵyndaǵy bılik mektepter men memlekettik mekemeler jumysyn dereý toqtatýǵa buıryq berdi.
El prezıdenti kishi Ferdınand Markos ońtústiktegi turǵyndardy evakýatsııalaýǵa buıryq bergeni málim boldy.
— Qazirgi kezde biz jaǵdaıdy baǵalap, barlyǵynyń qaýipsizdigin qamtamasyz etip jatyrmyz. Men Tótenshe jaǵdaılar qaýpin azaıtý jáne basqarý jónindegi ulttyq keńeske, Azamattyq qorǵanys basqarmasyna, Qarýly kúshterge, Fılıppın jaǵalaý kúzetine jáne barlyq tıisti mekemelerge jaǵalaýdaǵy aýdandardy dereý evakýatsııalaýdy, apattyq baılanys jelilerin iske qosýdy jáne áreketterin jergilikti bılik organdarymen tyǵyz úılestirýdi tapsyrdym, — dedi ol.
«Tynyq muhıttyq órt saqınasy» dep atalatyn aımaqta ornalasqan Fılıppın jer silkinisi men janartaý atqylaýy jıi bolatyn álemdegi eń seısmıkalyq belsendi elderdiń biri sanalady.
Buǵan deıin Fılıppınde bir apta ishinde 8 myńnan astam jer silkinisi tirkelgenin jazǵan edik.
Fılıppın ortalyǵyndaǵy Sebý provıntsııasynda bolǵan kúshti jer silkinisi saldarynan kem degende 69 adam qaza tapty.
Kazinform úshin TASS seriktes agenttigi usynǵan.