Fılıppınde kúshti jer silkinisinen qaza tapqandar sany artty
ASTANA. KAZINFORM – Búgin tańerteń Fılıppınde bolǵan 7,8 baldyq jer silkinisinen qaza tapqandar sany 15 adamǵa jetti, dep habarlaıdy Al Jazeera.
Buǵan deıin úsh adamnyń qaza tapqany týraly habarlanǵan bolatyn. Sondaı-aq shamamen 130 adam jaraqat aldy.
Fılıppın janartaýtaný jáne seısmologııa ınstıtýtynyń (PHIVOLCS) málimetinshe, alǵashqy jer silkinisinen keıin bir saǵattan astam ýaqytqa sozylǵan aftershoktar boldy.
Mındanaonyń ońtústigindegi 722 myńǵa jýyq adam turatyn General-Santos qalasy eń qatty zardap shekti.
Azamattyq qorǵanys basqarmasy aftershok qaýpine baılanysty turǵyndardy zaqymdalǵan ǵımarattar men ınfraqurylymnan aýlaq júrýge shaqyrdy.
Jer silkinisi eldegi memlekettik mektepterde jańa oqý jyly bastalǵan kúni boldy. Philippine News Agency memlekettik aqparat agenttiginiń málimetinshe, apat shamamen 3,2 mln oqýshyǵa, sondaı-aq 128 myń muǵalim men qyzmetkerge áser etti.
Jer silkinisinen keıin kóp uzamaı Tynyq muhıty tsýnamı týraly eskertý ortalyǵy Fılıppın jaǵalaýynyń keı bólikterinde bıiktigi úsh metrge deıin, al Indonezııa men Malaızııanyń keı bólikterinde bıiktigi bir metrge deıin jetetin tolqyndar bolýy múmkin ekenin eskertti. Keıinirek tsýnamı qaýpi negizinen ótkeni týraly habarlandy.
Japonııada da tsýnamı týraly eskertý jarııalandy, alaıda Japonııa meteorologııalyq agenttigi ony segiz saǵattan keıin joıdy.
Osyǵan deıin Grekııanyń Evbeıa aralynda magnıtýdasy 4,9 bolatyn jer silkinisi tirkeldi.
