Fılıppınde kepildikte qaza tapqandar boıynsha Gonkongte qaraly kún jarııalandy
ASTANA. Tamyzdyń 24-i. QazAqparat - Gonkong aza tutýda. Búgin Fılıppınde qaza tapqan týrıster boıynsha elde qaraly kún jarııalandy.. Fılıppındik arnaıy qyzmet júrgizgen kepildegilerdi bosatý jónindegi operatsııa qorytyndysynda 8 adam mert boldy, taǵy 7 adam aýrýhanaǵa jatqyzyldy, dep habarlaıdy Vestı.Rý.
Jaqyndary qaza bolǵan jáne zardap shekken otbasylar úshin Manılaǵa arnaıy kólik qatynasy uıymdastyryldy. Provıntsııa bıligi olarǵa qoldan kelgen kómektiń barlyǵyn jasaýda.
Gonkong óz azamattaryna Fılıppınge týrıstik saparǵa barýdan bas tartýǵa shaqyrýda. Manıladaǵy qasiretti Qytaı SІM-i de qatty synǵa aldy. Vedomstvo eldegi Qytaı azamattarynyń qaýipsizdigin qamtamasyz etýdi talap etýde. Qutqarý operatsııasynyń sátsiz oryndalǵanyn tiri qalǵan kepilder de rastap jatyr.
Oqıǵa bylaı órbigen edi. Gonkongtan shyqqan týrıstik avtobýsty 55 jastaǵy burynǵy fılıppın polıtseıi Rolando Mendos basyp alǵan. Mendostyń týǵan baýyry júrgizip otyrǵan kelissózder birneshe saǵatqa sozyldy. Biraq, odan esh nátıje bolmady. Qarańǵy túskende shabýyl jasaý týraly sheshim qabyldandy. Alǵashqy áreketke Mendos toıtarys berip, avtobýs ishinde atys bastaldy. Ekinshi ret jasalǵan shabýyl barysynda qylmysker oqqa ushty, segiz adam qaza bolyp, taǵy da jeteýi aýrýhanaǵa jetkizildi.
