Fılıppınde «Kalmaegı» taıfýnynan qaza tapqandar sany artyp keledi
ASTANA. KAZINFORM – Fılıppınde tabıǵı apat saldarynan kem degende 140 adam qaza taýyp, taǵy 127 adam iz-túzsiz joǵalyp ketti, dep habarlaıdy DW.
«Kalmaegı» taıfýny úlken qıratýlarǵa ákelip, bıyl aımaqqa soqqy bergen eń kúshti taıfýndardyń birine aınaldy.
Tótenshe jaǵdaılar vedomstvosynyń habarlaýynsha, apat saldarynan zardap shekken aımaqtardy zerttep júrgen áskerı tikushaq apatynan alty adam qaza tapty.
Qalǵan adamdar sý tasqyny, aǵashtardyń qulaýy jáne ǵımarattardyń opyrylýynyń qurbany boldy. 430 myńnan astam adam úılerinen ketýge májbúr boldy.
Apat eldiń eń iri aral toptary – Lýson, Vısaıas jáne Mındanaodaǵy 24 provıntsııaǵa áser etti. Kóptegen aýdandarda elektr qýaty úzilip, ondaǵan reıs toqtatyldy.
5 qarashada Fılıppınge soqqan taıfýn kúshti jel, nóser jańbyr jáne úlken tolqyndarmen qatar júrdi. Fılıppındik Pagasa meteoqyzmetiniń málimetinshe, daýyl álsiregen, biraq jeldiń ekpini saǵatyna shamamen 180 shaqyrymǵa jetip otyr.
Kóptegen eldi mekenderde kósheler tolyǵymen sý astynda qaldy, kólikter shaıylyp ketti nemese aýdarylyp qaldy, al turǵyndar qaýipsizdik úshin shatyrlarǵa shyǵýǵa májbúr boldy.
Sınoptıkterdiń málimetinshe, Fılıppınde «Tıno» ataýymen belgili «Kalmaegı» qurlyqqa jeti ret jetti, sońǵysy tańerteń Palavan provıntsııasynyń batysyndaǵy El-Nıdo qalasynda boldy.
Taıfýn sársenbi nemese beısenbi kúnderi elden shyǵyp, Vetnamǵa qaraı bet alady dep kútilip otyr. Demalys kúnderi Taılandtyń soltústiginde qatty jańbyr jaýatyny boljandy.
Osy arada meteorologtardyń málimetinshe Fılıppınge jańa tropıkalyq tsıklon jaqyndap keledi. Ol juma nemese senbi kúnderi jaǵalaýǵa jetip, demalys kúnderi saǵatyna keminde 240 shaqyrym jyldamdyqpen soǵatyn asa qýatty tropıkalyq daýylǵa aınalýy múmkin.
Fılıppınder jyl saıyn shamamen 20 taıfýnnan zardap shegedi. Olardyń ishindegi eń joıqyn taıfýn «Haııan» 2013 jyldyń qarashasynda 6300-den astam adamnyń ómirin qıdy.
Memleket basshysy 5 qarasha kúni Fılıppın Prezıdentine kóńil aıtý jedelhatyn joldady.