Fılıppınde «Glenda» taıfýnynan qaza tapqandar sany 38-ge jetti (TOLYQTYRYLDY)
ASTANA. QazAqparat - Fılıppınde "Glenda" taıfýnynan (halyqaralyq klassıfıkatsııa boıynsha - "Ramassýn") qaza tapqandar sany 38-ge jetti, beseýi iz-túzsiz joǵalǵan, dep jazady ria.ru.
Osyǵan deıin 20 adamnyń qaza tapqany týraly habarlanǵan.
Dagýpan qalasynyń ońtústik-batysynan 380 shaqyrym jerde beısenbi kúni tańerteń saǵatyna 130 km/saǵ, keıde 160 km/saǵ jyldamdyqpen júıtkigen taıfýn bolǵan. "Glenda" Ońtústik Qytaı teńizi arqyly saǵatyna 24 km jyldamdyqpen Qytaıdyń ońtústik provıntsııalaryna qaraı bet alǵan.
Tabıǵı apat saldarynan jarty mıllıonnan astam fılıppındikter úıin tastap ketýge májbúr boldy. Qazir olar qaıta oralýda. Aǵashtar men baǵanalardyń qulaýynan buzylǵan elektr taratýshy jáne elektr jabdyqtaýshy júıeler Lýson aýmaǵynyń jartysynda ǵana qalpyna keltirildi.
Jyl saıyn maýsym aıynan jeltoqsanǵa deıin Fılıppın arhıpelagynda ondaǵan taıfýn bolady. Ótken jyldyń qarasha aıynda tarıhtaǵy eń kóp zalal keltirgen "Haııan" ("Iolanda") sýpertaıfýny ótken. Onyń saldarynan 1,1 mln. úı túgel jáne jartylaı buzylyp, 4 mln. adam baspanasyz qalǵan. 6,3 myń adam qaza tapty, myńnan astamy iz-túzsiz joǵaldy. Materıaldyq shyǵyn 2 mlrd. dollardan astam somaǵa baǵalandy.
