Fılıppınde «Fýng-Vong» sýpertaıfýny saldarynan mıllıonǵa jýyq adam evakýatsııalandy

ASTANA. KAZINFORM – Fılıppın araldary bıylǵy eń qýatty «Kalmaegıden» keıin taǵy bir joıqyn tabıǵı apat — «Fýng-Vong» sýpertaıfýnynyń soqqysyna tap boldy, dep habarlaıdy Euronews.

Qaýipsizdik maqsatynda el bıligi mıllıonǵa jýyq adamdy evakýatsııalaýǵa sheshim qabyldady. Fılıppın prezıdenti kishi Ferdınand Markos elde tótenshe jaǵdaı jarııalady. Birqatar provıntsııalarda jaryq óshirilip, mektepter men teńiz porttarynyń jumysy ýaqytsha toqtatyldy.

«Fýng-Vong» arhıpelagqa soltústik-shyǵystan jetip, saǵatyna 185 km jyldamdyqpen, ekpini 230 km/saǵ deıin jetetin jelmen soqqan. Fılıppın zańnamasy boıynsha jeldiń osyndaı kúshimen soǵatyn tropıkalyq tsıklondar «sýpertaıfýn» sanatyna jatady.

Eldiń qorǵanys mınıstri kishi Gılberto Teodoro turǵyndarǵa dereý evakýatsııalaný týraly eskertý jasady. Onyń aıtýynsha, «Fýng-Vong» saldarynan kenet sý tasqyny, kóshkin jáne jaǵalaýdaǵy tolqyndar qaýpi bar.

Sýpertaıfýnnyń yqpaly Sebý provıntsııasyna, sondaı-aq el astanasy Manılaǵa deıin jetýi múmkin. Bul óńirlerde mıllıondaǵan adam turady jáne negizgi úkimettik, qarjylyq ortalyqtar ornalasqan.

Fılıppınniń azamattyq qorǵanys basqarmasynyń dereginshe, «Fýng-Vongtyń» áserinen 30 mıllıonnan astam adam qaýip aımaǵynda qalýy yqtımal.

Apta sońynda jáne dúısenbi kúni 325 ishki jáne 61 halyqaralyq reıs keıinge qaldyryldy. Sonymen qatar 6 600-den astam jolaýshy men teńiz qyzmetkerleri teńiz porttarynda qalyp qoıdy — jaǵalaý kúzeti kemelerge teńizge shyǵýǵa tyıym salǵan.

Eske salaıyq, buǵan deıin Fılıppınde «Kalmaegı» taıfýny saldarynan 200-den astam adam qaza tapqan bolatyn.