Fılıppındi qıratqan qýatty taıfýn Vetnamǵa baǵyt aldy

ASTANA. KAZINFORM — Fılıppındegi júzden asa adamnyń ómirin jalmaǵan «Kalmaegı» taıfýny Vetnamnyń ortalyq aımaqtaryna qaraı jyljyp keledi, dep jazdy BBC.

Jeldiń jyldamdyǵy áli de qýatty. Jergilikti teńiz jaǵalaýyndaǵy myńdaǵan turǵyn evakýatsııalanýǵa shaqyryldy. Vetnam meteorologııalyq bıýrosynyń dereginshe, taıfýn 8 metr bıiktikte tolqyndar ákelýi múmkin.

Vetnamnyń vıtse-premeri Tran Hong Ha «Kalmaegı» taıfýnyn «óte anomaldy kúshke ıe» dep sıpattap, jergilikti bılikti tez áreket etýge shaqyrdy.

«Kalmaegı» bıylǵy jyldyń eń qýatty taıfýndarynyń biri. Vetnamda sońǵy aptada rekordtyq jaýyn-shashyn men sý tasqyny bolǵany belgili. Tabıǵı apattan adam ólimi tirkeldi.

Aımaqta alty áýejaı qyzmetin toqtatty, 50-den astam reıs keıinge qaldyryldy. 

Fılıppın prezıdenti Ferdınand Markos kishi keshe elde tótenshe jaǵdaı jarııalady. Ol sheshimin «Kalmaegı» úlken shyǵyn keltirgenimen túsindirdi. Al demalys kúnderi eldi «Ývan» dep atalatyn jańa daýyl soǵýy múmkin dep boljanyp otyr.

— Bul shamamen 10 óńirdi, 10–12 aımaqty qamtıdy. Osyndaı kólemde zardap shekken aýmaqtar bolsa — bul ýje ulttyq apat dep esepteledi, — dedi prezıdent jergilikti BAQ-qa.

Fılıppınde tótenshe jaǵdaı adamdar kóp qaza bolǵan jaǵdaıda, múlikke úlken zalal kelgende nemese adamdardyń kúndelikti ómirine qaýip tóngende jarııalanady. Bul kezde memleket apattyq qorlarǵa tez qol jetkize alady jáne qajet zattar men qyzmetterdi zardap shekkenderge jyldam jetkizedi.

Sebý aralynda, eldegi eń tyǵyz qonystanǵan aımaqta, qalalar sý astynda qaldy. Ulttyq azamattyq qorǵanys basqarmasy Sebýda 71 adamnyń qaza bolǵanyn, taǵy 127 adamnyń iz-túzsiz joǵalǵanyn, 82 adamnyń jaralanǵanyn habarlady. AFP agenttiginiń dereginshe, bul statıstıkaǵa keıinirek habarlanǵan taǵy 28 óli adam qosylmaǵan. Ulttyq apattardy joıý agenttigi 2,5 mıllıon turǵynnyń 400 myńnan astamyn úılerinen kóshirýge májbúr bolǵanyn aıtty.

Eske sala keteıik, buǵan deıin Fılıppınde «Kalmaegı» taıfýnynan qaza tapqandar sany artqanyn jazdǵan edik.