Fılıppın prezıdenti BUU quramynan shyǵamyz dep ses kórsetti
ASTANA. QazAqparat - Fılıppın prezıdenti Rodrıgo Dýterte BUU ony halyqaralyq quqyqty buzdy dep aıyptaǵannan keıin eldiń uıym quramynan shyǵýy múmkin ekenin málimdedi, dep habarlady Bı-bı-sı.
Jumada BUU sottan tys jazalaý problemasy boıynsha arnaıy baıandamashy Anes Kallamar Dýterteniń esirtki dılerlerin óltirýge shaqyrýy qylmyspen teń shekten shyqqan, jaýapsyz qadam ekenin málimdegen.
«BUU-dan shyǵýymyz kerek sııaqty. Mundaı aqymaqtyqqa ne úshin tózip otyrýymyz qajet?», - dep málimdeli ol baspasóz máslıhatynda.
Prezıdent BUU Sırııa men Iraktaǵy ashtyq, terrorızm, qarýly qaqtyǵystardy joıýǵa qabiletsiz dep aıyptady. Ol sondaı-aq Qytaı men Afrıka elderine jańa jahandyq halyqaralyq organ qurýdy usynýy múmkin ekenin atap ótti.
BUU derekterine sáıkes, Dýterte osy jylǵy mamyrda prezıdent laýazymyna kirisken kúnnen bastap esritki saýdasyna qarsy operatsııa júrgizgen kezde polıtseıler 800-den astam adamnyń kózin qurtqan.
Rodrıgo Dýterteniń saılaýaldy basty ýádesi de eldegi qylmys pen esirtki saýdasyn qurtý bolǵan edi.
