Fılıppın Prezıdenti adam óltirgenin moıyndady
ASTANA. QazAqparat - Fılıppın Prezıdenti Rodrıgo Dýterte Davao qalasynyń meri bolǵan ýaqytta kúdikti qylmyskerlerdi ózi óltirgenin málim etti. Ol osylaısha polıtseılerge qalaı jumys jasaý kerektigin kórsetkisi kelgen, dep habarlaıdy Agence France Presse agentigi.
Agenttik osy málimdemeni Dýterteniń 12 jeltoqsan, dúısenbi kúni bıznesmenderdiń aldynda sóılegen sózinde aıtqanyn atap ótken. Prezıdent óziniń esirtki bıznesin joıý naýqany týraly áńgimelegen. Ol memleket basshysy retinde 30 maýsym kúni taǵaıyndalǵaly beri polıtseıler men jasaqshylar myńdaǵan adam óltirgen dep aıtylýda. Dýterte qala basshysy bolyp turǵan kezinde esirtki satýshylardyń kózin joıýǵa qatysqanyn atap ótti. «Davaoda men muny ózim jasaıtynmyn. Tek jigitterge (polıtseıler) men muny jasaǵanda, olardyń da qoldarynan keletindigin kórsetkim keldi», - dedi ol.
Budan buryn quqyq qorǵaýshylar Dýterteni Davaodaǵy eskadrondar, myńdaǵan kúdiktilerdiń ólimin uıymdastyrdy dep aıyptaǵan edi. Al el prezıdenti bolsa birde moıyndap, birde teriske shyǵardy.
