Fılıppındegi mektepte atystan úsh oqýshy qaza tapty
ASTANA. KAZINFORM – Fılıppınniń ortalyq bóligindegi mektepte bolǵan atystan úsh oqýshy qaza taýyp, keminde 20 adam jaraqat aldy. Bul týraly Associated Press agenttigi habarlady.
Polıtsııanyń málimetinshe, tapanshamen qarýlanǵan 14 jáne 15 jastaǵy eki oqýshy dúısenbi kúni Takloban qalasyndaǵy San Jose National High School mektebinde oq jaýdyrǵan. Kúdiktiler ustaldy. Kúdiktiler de, qurbandar da osy mekteptiń oqýshylary bolǵan.
Polıtsııa jaralanǵan 20 adamnyń 15-i oq jaraqatyn alǵanyn habarlady. Olardyń arasynda basynan oq tıgen jáne aýrýhanada jatqan oqýshy da bar. Qalǵandary qaýipten qashyp bara jatyp, terezeden sekirip nemese qulap jaraqat alǵan.
1 500-den astam oqýshysy bar memlekettik mekteptegi atystyń sebepterin anyqtaý úshin tergeý bastaldy. Óńirlik polıtsııa basshysy Djeıson Kapoıdyń aıtýynsha, jaqyn dos bolǵan eki kúdikti alǵashqy jaýap alý kezinde mektepte býllıngke ushyraǵandaryn aıtqan.
Olardyń buryn sottylyǵy bolmaǵan. Kúdiktilerdiń biri shabýyl kezinde paıdalanǵan 9 mm tapanshany polıtsııa qyzmetkeri bolyp jumys isteıtin ápkesinen alǵan. Qazir oǵan qatysty da tergeý júrgizilip jatyr. Ekinshi kúdikti 38 kalıbrli revolver qoldanǵan. Djeıson Kapoıdyń sózinshe, mekteptiń birneshe kireberisi men shyǵaberisin bir ǵana kúzetshi baqylaǵandyqtan, olar qarýdy mektep aýmaǵyna ońaı alyp kirgen.
– Kúdiktiler eki synypqa kirgen. Birinshi synypta atys bastalǵannan keıin balalar jan-jaqqa qashqan, al kúdiktiler keıbir qurbandardy ekinshi synypqa deıin qýǵan sııaqty, – dedi Djeıson Kapoı jýrnalısterge.
Onyń aıtýynsha, qaza tapqandar men jaralanǵandardyń basym bóligi qyz balalar bolǵan. Polıtsııa oqıǵa ornynan keminde 40 oq dárisin tapqan.
Áleýmettik jelilerde jarııalanǵan vıdeolardyń birinde jabyq synypta partalardyń astyna jasyrynǵan oqýshylardyń aıqaılap, jylaǵan daýystary estiledi. Syrttan oq atylǵan dybystar shyqqan. Keıbir oqýshylar analaryna telefon soqqan. Basqa vıdeolarda qatty qoryqqan oqýshylardyń mektep aýmaǵynan jappaı shyǵyp bara jatqany, bir-birin qushaqtap turǵany kórinedi.
Kúdiktilerdiń biri shabýyldan keıin mektep ishinde ustalǵan. Al ekinshisi qashyp ketip, jaqyn mańdaǵy úılerdiń birine jasyrynǵan jerinen qolǵa túsken.
Aıta keteıik, osydan on kún buryn AQSh-tyń Mıdlend qalasynda bolǵan atys kezinde eki adam mert bolyp, taǵy 10 adam jaraqat aldy.
