Fılıppın arýy Miss Grand International 2025 baıqaýynda jeńiske jetti
ASTANA. KAZINFORM — Bangkok qalasynda 29 qyrkúıek pen 18 qazan aralyǵynda halyqaralyq sulýlyq baıqaýy ótti. Onda «Miss Grand International 2025» baıqaýynyń jeńimpazy belgili boldy.
Táj fılıppındik sulý Emma Merı Tıglaoǵa tabystaldy.
Baıqaýdyń úzdik ondyǵyna Kolýmbııa, Chehııa, Meksıka, Venesýela, Gvatemala, Taıland, Fılıppın, Tanzanııa, Gana jáne Ispanııa ókilderi endi.
Bul jarysqa elimizdiń atynan qyzylordalyq 23 jastaǵy Tomırıs Qadyrhan qatysty.
— Tomırıs Qadyrhan Miss Grand International baıqaýynda Qazaqstan atynan qatysyp, «Grand Talent» nomınatsııasynda úzdik 15 qatysýshynyń qataryna kirdi. Otandasymyzdyń halyqaralyq baıqaýda kórsetken óneri qazylar alqasynyń kóńilinen shyqty, - dep habarlady Qazaqstan arýy baıqaýynyń uıymdastyrýshylary.
Miss Grand International — jyl saıyn 70-ten astam eldiń ókilin jınaıtyn eń bedeldi sulýlyq baıqaýlarynyń biri. Oǵan qatysýshylar tek syrtqy kelbetin ǵana emes, sonymen qatar kóshbasshylyq qasıetterin, ıntellektisin, harızmasyn jáne áleýmettik belsendiligin kórsetedi.
Qazaqstan arýy jeńimpazdary úsh halyqaralyq baıqaýǵa qatysady: Miss Grand International, Miss World jáne Miss Universe.
Eske salsaq, budan buryn Taıland stýdenti «Álem arýy-2025» baıqaýynda jeńiske jetkenin jazǵan edik.