Fıladelfııadaǵy ushaq apatynan qaza bolǵandar sany 7 adamǵa jetti

ASTANA. KAZINFORM — Keshe medıtsınalyq evakýatsııalyq ushaq Fıladelfııanyń soltústik-shyǵysynda ushqannan keıin kóp uzamaı apatqa ushyraǵan edi.

BBC málimetinshe borttaǵy barlyq alty adam qaza tapty, sonymen qatar jer betinde kólikte bolǵan bir adam kóz jumǵan.

Apatqa ushyraǵan Learjet 55-ke tıesili áýe jedel járdem kompanııasy bortta tórt ekıpaj múshesi, pedıatrııalyq bólimniń bir naýqasy jáne onyń qasynda erip júrgen adamnyń bolǵanyn habarlady.

Fıladelfııa meri Sherell Parker ushaq apatynan jer betinde taǵy 19 adam zardap shekkenin málim etti, biraq bul áli túpkilikti san emes kórinedi.

Jet Rescue Air Ambulance ókili Shaın Gold jergilikti NBC arnasyna suhbat berip, apatqa ushyraǵan ushaq AQSh-ta qaýipti dertten emdelip jatqan meksıkalyq qyzdy tasymaldaǵanyn aıtty. Bortta taǵy bes adam boldy — balanyń anasy, ushqysh, ekinshi ushqysh, dáriger jáne feldsher, dedi kompanııa ókili.

Sondaı-aq, ákimniń málimdemesine sáıkes borttyq jýrnaldar ushaqtyń «apatqa ushyraǵanǵa deıin bir mınýt qana» aýada bolǵanyn kórsetedi.

— Apat saldarynan jerdegi kóptegen adam — avtoturaqtarda, kóshelerde, kólikterde jáne aýdandaǵy úılerde — jaraqat aldy, — delingen habarlamada.

Sonymen qatar Sherell Parker oqıǵa ornynda ótken baspasóz máslıhatynda jerde birneshe úı men kólik órtenip ketkenin jetkizdi. Eki saǵattan keıin órt sóndirildi.

Eske salsaq, keshe Fıladelfııada sanıtarlyq avıatsııa ushaǵy apatqa ushyraǵany belgili boldy.

Budan bólek, AQSh-ta 30 qańtarda Vashıngton áýejaıynyń mańynda shaǵyn ushaq ózenge qulaǵany anyqtaldy.

Prezıdent Tramp Vashıngtondaǵy ushaq apatynan eshkim aman qalmaǵanyn habarlady.