Fıladelfııada sanıtarlyq avıatsııa ushaǵy apatqa ushyrady

ASTANA. KAZINFORM — Medıtsınalyq evakýatsııa ushaǵy Fıladelfııanyń soltústik-shyǵysynda áýege kóterilgennen keıin kóp uzamaı apatqa ushyrady, dep habarlaıdy BBC. 

Apatqa ushyraǵan Learjet 55 ushaǵyn basqarǵan sanıtarlyq avıatsııa kompanııasy onyń bortynda ekıpajdyń tórt múshesi, pedıatrııalyq bólimnen bir naýqas jáne jolserik bolǵanyn habarlady.

— Qazirgi kezde biz tiri qalǵandardyń bar ekenin rastaı almaımyz, — delingen Jet Rescue Air Ambulance málimdemesinde.

Jergilikti BAQ-tyń habarlaýynsha, Roosevelt Mall janynda zardap shekkender kóp — apat jergilikti ýaqyt boıynsha saǵat 18:30–da bolǵan.

Beınejazbadan ushaqtyń jerge qulap, jarylǵanyn kórýge bolady.

Fıladelfııa meri Sherell Parker oqıǵa ornynda ótkizgen baspasóz máslıhatynda birneshe úı men kóliktiń órtengenin habarlady. 

Sanıtarlyq avıatsııa ushaǵy Soltústik-Shyǵys Fıladelfııa áýejaıynan ushyp shyǵyp, Mıssýrı shtatyndaǵy Sprıngfıld-Bransonǵa bet aldy. Apattyń sebepteri ázirge belgisiz.

BAQ-tyń habarlaýynsha, aýa raıy salqyn jáne jańbyrly, al kóriný nashar boldy.

Eske salsaq, 30 qańtarda Vashıngton áýejaıynyń mańynda shaǵyn ushaq ózenge qulady. 

Prezıdent Tramp Vashıngtondaǵy ushaq apatynan eshkim aman qalmaǵanyn habarlady.